سەرۆک بارزانی : یەكتر قبووڵكردن بەشێكی سەرەكیی بیروباوەڕی ئێمەیە

سەرۆك بارزانی لە "رۆژی نزای نیشتمانی" گوتارێكی پێشكەش كرد و ئاماژەی بەوە كرد، "جەوهەری دین، ئەخلاقە." ئەوەیشی خستەڕوو، "یەكتر قبووڵكردن بەشێكی سەرەكیی بیروباوەڕی ئێمەیە".

 سەرۆك بارزانی رای گەیاند، پێش ئەوەی دەست بە گوتارەكەم بكەم، دەمەوێت ڕای بگەیەنم كە جارێكی تر هاوبەشی هەموو مرۆڤدۆستانین لە جیهان بۆ لە دەستدانی پیاوێكی گەورەی ئاشتیخواز و مرۆڤدۆست، ئەویش قەداسەتی پاپایە. 

سەرۆك مەسعوود بارزانی لە گوتارەكەیدا، گوتەیەكی مەولانای رومیی بە نموونە هێنایەوە كە گوتوویەتی، "حەق وەك لووتكەی چیایە و چەندان رێگە هەیە بۆ گەیشتن بە لووتكە، بەڵام ئامانجی هەموو رێگەكانیش یەكن و گەیشتنە بە حەق."

سەرۆك بارزانی دەڵێت، "هەموومان بەندەی خوداین و لە مرۆڤایەتیدا خوشك و برای یەكدترین." گوتیشی، "هەموو پێغەمبەران ئامۆژگارییان ئەوە بووە كە دەستی برایەتی بۆ یەكتر درێژ بكەین و ئامۆژگاریی پێكەوەژیانیان كردووە."

سەرۆك بارزانی لە درێژەی گوتارەكەیدا گوتی، ئەمە یەكەمین جارە كۆبوونەوەیەكی وا لە كوردستان ڕێكدەخرێت، مەبەست ئەوەیە كە دنیا ئاشنا ببێت بەو كولتوورە دەوڵەمەندەی لە كوردستان هەیە و لە دێرزەمانەوە ئەو كولتوورە لە كوردستان هەبووە. ئەویش كولتووری پێكەوەژیان و یەكتر قبووڵكردن و ئازادیی بیروڕا و دین و مەزهەب، ئەو كولتوورەیە كە ئێمە شانازیی پێوە دەكەین و داكۆكیش دەكەین كە بەردەوام دەبین لەسەر ئەم ڕێگەیە.