هەواڵی خۆش بۆ هاوڵاتیانی هەولێر هات

پڕۆژەی فریاگوزاریی خێرای ئاوی هەولێر بەردەوامە، تا ئێستە نزیكەی 75٪ـی كارەكانی تەواو بوون، بەڕێوەبەری گشتیی ئاوی هەرێمی كوردستان رای گەیاند، لە كۆتایی مانگی شەش یان سەرەتای مانگی حەوت، ئاو دەگاتە سێ‌ شارەوانی و چەند ناوچەیەك.

ئەمڕۆ یەكشەم 27ـی نیسان، ئاری ئەحمەد بەڕێوەبەری گشتیی ئاوی هەرێمی كوردستان،  رایگەیاند، كاركردن لە پڕۆژەی فریاگوزاریی خێرای ئاوی هەولێر بەردەوامە كە لەلایەن هێمن گرووپ جێبەجێ‌ دەكرێت.

زیاتر گوتی، كۆتایی مانگی شەش یان سەرەتای مانگی حەوت، ئاو دەگوازێتەوە و بۆ شارەوانییەكانی چوار و پێنج و شەش، هەروەها ناوچەكانی كەسنەزان و بنەسڵاوە و دارەتوو ئاویان بۆ دەگوازێتەوە.

باسی لەوەش كرد، ئێستە پڕۆژەكە 75%ـی تەواو بووە، یەكێك لە چوار هێڵە سەرەكییەكەی بۆ هەولێر ئاو دەگوازێتەوە، لە كۆتایی مانگی شەش دەبێت و بەكار دەخرێت. 

بە گوژمەی نزیكەی 480 ملیۆن دۆلار، كاركردن لە پڕۆژەی فریاگوزاریی خێرای ئاوی هەولێر بەردەوامە، تا ئێستە نزیكەی 75٪ـی كارەكانی تەواو بوون و بڕیارە لە مانگی تەمووزی ئەمساڵ، بەشی یەكەمی بكەوێتە كار و ئاو بگەیەنرێتە ئەو گەڕەكانەی دەكەونە سنووری شارەوانییەكانی (چوار، پێنج، شەشی هەولێر ).

ئەو پڕۆژەیە توانای هەیە لە یەك سەعاتدا 20 هەزار مەتر سێجا ئاو بۆ هەولێر دابین بكات، كە دەكاتە 60٪ـی پێویستیی هەولێر بە ئاو، 40٪ـەكەی تریش لە رێگەی هەرسێ پڕۆژەی ئیفراز (یەك، دوو، سێ) دابین دەكرێت، بە تەواوبوونی ئەو پڕۆژەیەش، 100٪ كێشەی ئاو بۆ دەیان ساڵ لە هەولێر بنەبڕ دەكرێت.

ئێستە بە بەردەوام و 24 سەعات كار لەو ئەو پڕۆژەیەدا دەكرێت، قۆناغەكانی راكێشانی بۆڕی بۆ گەڕەكەكانی هەولێر دەستی پێ كردووە، كوالێتیی ئەو كەرەستانەشی لەو پڕۆژەیەدا بەكار هێنراون، لە ئاستێكی زۆر بەرزدایە و بڕیارە لە مانگی تەمووزی ئەمساڵ، بەشی یەكەمی بكەوێتە كار و ئاو بگەیەنرێتە ئەو گەڕەكانەی دەكەونە سنووری شارەوانییەكانی (چوار، پێنج، شەشی هەولێر )