پارە گەیشت و دابەشدەکرێت

بەرپرسێکی ژمێریاریی پێشمەرگە ڕایگەیاند، سبەی کە هاوکاریی دارایی مانگی چواری هێزەکانی هاوپەیمانان بۆ لیواکانی پێشمەرگە دابەش دەکرێت، بڕەکەی 214 هەزار و 750 دینارە.
مانگی سێ بڕی هاوکارییەکە 216 هەزار دینار بوو، مانگی دووش بڕەکەی 230 هەزار دینار بوو.
بەرپرسەکەی ژمێریاریی پێشمەرگە ئاشکراشی کرد، بۆ ئەم مانگە نزیکەی هەشت هەزار پێشمەرگەی دیکە بۆ یەکەمجارە لە هاوکارییەکە سوودمەند دەبن.
لیوا هۆشمەند ڕەشید، جێگری سوپاسالاری پێشمەرگە بۆ کاروباری ئیدارە و میرە، ڕایگەیاند: "هاوکارییەکە بڕێک کەمی کردووە، هۆکارەکەیشی ئەوەیە، بەپێی ڕێکارەکانی هاوپەیمانان، چەند فەوجێکی لیواکان بۆ وەرگرتنی ئەو هاوکارییە زیاد کراون."
ئەوە لە کاتێکدایە، بەپێی بەدواداچوونەکان بۆ مانگی 1ی2025، بڕی هاوکارییەکە 238 هەزار و 775 دینار بوو، مانگی 12ی 2024یش بڕەکەی 234 هەزار دینار بوو، مانگی 11 بڕەکەی 289 هەزار دینار بوو.
زۆرترین بڕی هاوکارییەکە مانگی نۆی ساڵی ڕابردوو بوو کە 407 هەزار دینار بوو.
بۆ مانگی چوار 56 هەزار پێشمەرگە هاوكارییەكە وەردەگرن کە بەشی زۆریان لە ڕێی (هەژماری من)ەوە وەردەگرن.
لیوا هۆشمەند جەختی کردەوە: "لەلایەن هاوپەیمانانەوە ئەوە دووپات کراوەتەوە کە هاوكاریى دارايى بۆ پێشمەرگە بەردەوام دەبێت."
 
هاوکاریی مانگانە کە دەرێتە لیواکانی هێزی پێشمەرگە، هیچ پەیوەندییەکی بە مووچەوە نییە.