هەواڵی خۆش بۆ هاوڵاتیانی سلێمانی گەیشت

سەرۆكی شارەوانیی سلێمانی رای گەیاند، تا كۆتایی ساڵ بەشی زۆری شەقامی 100 مەتریی سلێمانی تەواو دەبێت.

لەیلا عومەر سەرۆكی شارەوانیی سلێمانی، ئەمڕۆ شەقامی 100 مەتریی سلێمانیی بەسەر كردەوە و رای گەیاند، كارەكان خێرا كراون و حكوومەت ئاسانكاریی بۆ كۆمپانیای جێبەجێكار دەكات تا بەزووترین كات بەشێكی گرنگی پڕۆژەكە بكرێتەوە.

سەرۆكی شارەوانی سلێمانی باسی لەوەش كرد، شارەوانی سولفەكانی لە كاتی خۆی دەدات بە كۆمپانیاكە و ئەو زەوییانەش دانراون بۆ تەواوكردنی شەقامەكە بفرۆشرێن، هەمووی دەفرۆشرێن، وەزارەتی داراییش كارئاسانی دەكات و بەهاوكاریی هەمووان لە كۆتایی ساڵ بەشێكی گرنگی پڕۆژەكە دەكرێتەوە.
  
بڕیارە لە پردی تاسڵووجەوە تا یەكتربڕی لەگەڵ شەقامی قەرەداغ بە تەواوی بڕگەكانی رێگەكەوە تەواوبكرێـ، لەگەڵ  تەواوكردنی یەكتربڕەكانی ژمارە (12-13-14-15-16-17) تا كۆتایی ئەمساڵ و كردنەوەی ئەو بەشەی شەقامەكە بەڕووی هاووڵاتییاندا.
 
سەرۆكی شارەوانیی سلێمانی ئاماژەی بەوە كردووە، بڕیاریان داوە كە كاركردن لە یەكتربڕەكانی تاسڵووجە ژمارە 11 و 24 سەرچەمی تانجەڕۆ چڕ بكرێتەوە. كۆمپانیای قەیوان بەڵێنی دا بە پێشكێشكردنی پلانێكی چڕی كاركردن و تەواوكردنی كارەكان لە ماوەی یاسایی پڕۆژەكەدا.
 
شەقامی 100 مەتریی سلێمانی كە بە "ئۆتۆبانی بابان"یش ناسراوە، یەكێكە لە پڕۆژە ستراتیجییەكان و درێژییەكەی 34 كیلۆمەترە. بۆ تەواوكردنی پڕۆژەكە حەوت یەكتربڕ، پێنج ئەندەرپاس، و چوار پرد و فلای ئۆڤەرێكی تێدەكەوێت. 
 
ئۆتۆبانی بابان لە 11-7-2020 بەردی بناغەی دانرا، بە ‌چە‌ند قۆناغێك جێبە‌جێ دە‌كرێت، گوژمەی پڕۆژەكە 400 ملیار دینارە و بڕیار بوو لە ‌ماوە‌ی هەزار و 100 رۆژ واتە تا 30-8-2023 تەواو بكرێت.