بەهۆی دواكەوتنی مووچە و مامەڵەی خانەشینان، بۆ ڕێكخستنەوە و زیاتر خزمەتكردنی خانەنشینانی مەدەنی و سەربازی و هێزەكانی ئاسایشی ناوخۆ، لە كۆبوونەوەی ئاسایی ئەنجوومەنی وەزیرانی هەرێمی كوردستان، بڕیاری پێكهێنانی لیژنەیەكی تایبەتمەند درا تا بە زووترین كات ئەم بابەتە چارەسەر بكرێت.
ئەمڕۆ پێنجشەم 22ـی ئایار، فەرمانگەی میدیا و زانیاریی حكوومەتی هەرێمی كوردستان بڵاوی كردووەتەوە، ئەنجوومەنی وەزیرانی هەرێمی كوردستان، هەریەك لە وەزارەتەكانی (كاروباری پێشمەرگە، ناوخۆ، دارایی و ئابووری)ی ڕاسپاردووە بۆ پێكهێنانی لیژنەیەك.
ئاماژە بەوەش كراوە، ئەو لیژنەیە بۆ ئەوەیە بە زووترین كات لیژنەیەكی تایبەتمەندی هاوبەش پێكبهێنن بۆ دانانی ڕێكار و میكانیزمی گونجاو، بۆ ئاسانكاریی لە زووبەجێگەیاندنی ڕێكارەكانی خانەنشینی و خەرجكردنی مووچە و شایستەكانی خانەنشینانی هەرێمی كوردستان، بە جۆرێك مامەڵەكانی خانەنشینی و خەرجكردنی شایستە داراییەكانیان دوا نەكەوێت.
ئاماژە بەوەش كراوە، ئەنجوومەنی وەزیران داوا لە وەزارەتەكانی (كاروباری پێشمەرگە، ناوخۆ و دارایی و ئابووری) دەكات، پێویستە سەرلەنوێ لە چوارچێوەی یاسایەكی خانەنشینیی یەكگرتوو و تایبەت بە هەرێمی كوردستان ڕێك بخرێتەوە، كە ڕەچاوی تایبەتمەندێتیی هەرێمی كوردستان بكرێت، بەتایبەتی بابەتی دەستنیشانكردنی تەمەنی خانەنشینی، هێنانەكایەی دەستەیەكی نیشتمانی بۆ كاروباری خانەنشینان لە چوارچێوەی ئەم یاسایە دەبێت.
وەڵام بدەوه