وەزارەتی دارایی هەرێمی کوردستان وەڵامی تەیف سامی دەداتەوە

وەزارەتی دارایی و ئابووریی حكوومەتی هەرێمی كوردستان، بە نووسراوی فەرمی و داتای ڕاست و دروست، وەڵامی دارایی عێراق دەداتەوە.
سەرچاوەیەک لە وەزارەتی دارایی و ئابووریی حكوومەتی هەرێمی كوردستانەوە  ڕایگەیاند: "ئەو نووسراوەی دوێنێی دارایی فیدراڵ كە بە واژۆی تەیف سامی دەركرابوو، هەمووی چەواشەکارییە، بۆیه ئێمە شەوی ڕابردوو لە ڕێگەی تیمێکمان تاوەکوو درەنگانی شەو خەریکی ئامادەکردنی وەڵام و نووسراو بووین."
سەبارەت بە وەڵامەکە گوتی: "بە نووسراوی فەرمی و بە داتای ڕاست و دروست وەڵامی تەیف سامی دەدرێتەوه و ڕای گشتیش لە ناوەڕۆکەکەی ئاگادار دەکرێتەوە."
جەختی کردەوە: "ئەوەی دەکرێ تەنیا وەڵامدانەوەیەک نییە، بەڵکوو پڕ لە زانیاری و بەڵگەیە، کارەکەش بە هەماهەنگیی ئەنجوومەنی وەزیران دەکرێت."
ئەو سەرچاوەیەی وەزارەتی دارایی ئاماژەی بەوەش دا: "ئەو نووسراوەی لە بەغداوە کراوە، دژی هەموو ڕێکكەوتن و بڕیارەکانە."
جێی باسە، دوێنێ د. هاوڕێ كەمال، راوێژكار لە وەزارەتی دارایی و ئابووریی حكوومەتی هەرێمی كوردستان،  رایگەیاند: "سەرەتای ئەمساڵ ئێمە لەگەڵ دارایی عێراق رێككەوتنمان كردووە لەسەر هەر 12 مووچەكەی ساڵی 2025 و بڕیاری دادگای فیدراڵییش هەیە و نابێ مووچە تێکەڵی هیچ پرسێک بکرێت."
بەرپرسەكەی دارایی جەختی كردەوە: "هەر مانگێك مووچە دوا بخرێت، بە دڵنیاییەوە پەیوەندیی بە بواری تەكنیكییەوە نییە، بەڵكوو پاڵنەری سیاسیی لە پشتەوەیە."
لە لایەن خۆیەوە د. نەرمین مەعرووف، ئەندامی لێژنەی دارایی پەرلەمانی عێراق بڵاوی کردەوە: "ئەم نووسراو و ئەم هەڵوێستەی وەزارەتی دارایی پێجەوانەی بڕیاری دادگای فیدراڵییە."
ئاماژەی بەوەش دا: "هەروەها ئەو شێوازەی پشکی هەرێمی پێ ئەژمار کراوە لەو نووسراوەی وەزارەتی دارایی هیچ بنەمایەکی یاسایی و ژمێریاری نییە، جگە لەوەی حکوومەتی فیدراڵ هێشتا خشتەی داهات و خەرجی ساڵی 2025 نەناردووە بۆ ئەنجومەنی نوێنەران کە پێچەوانەی مادەی 77/دووەم لە یاسای بودجەی سێ ساڵەیە"
جەختی کردەوە: "بۆ چارەسەرکردنی ئەم کێشەیە، هەموو رێکارێکی دەستوری و پەرلەمانیی دەگرینە بەر."