مەشعان جبووری كشانەوەی كورد لەبەغدا بوومەلەرزەیەک ئەبێ بۆ عێراق

سیاسەتمەدارێكی عێراقی لەوبارەوە دەڵێ، كورد هاوبەشی سەرەكیین لە ڕووخاندنی رژێمی سەدام و كردنەوەی دەرگاكانی نێودەوڵەتی بۆ ئۆپۆزسیۆنی عێراق.

مەشعان جبووری، سیاسەمەتداری عێراقی، لە پێگەی خۆی لە تۆڕی كۆمەڵایەتیی (ئێكس)، رایگەیاندووە: ”كشانەوەی كورد لە پرۆسەی سیاسی بوومەلەرزەیەک ئەبێ لە سەقامگیریی عێراق دەدات.“

ئەو سیاسەتمەدارەی عەرەب، هەروەها لە ئەگەری كشانەوەی كورد لە پرۆسەی سیاسیی عێراق نووسیویەتی: ”كشانەوەی كورد لە پرۆسەی سیاسی بەتەنیا دووركەوتنەوەی پێكهاتەیەك نییە، بەڵكوو ئەبێتە هۆی داڕووخانی بەشێك لە شەرعییەتی نیشتمانی، كە زۆر زەحمەتە عێراق بتوانێ بەرگەی لێكەوتەكانی بگرێ،“
مەشعان جبووری دەشنووسێ: ”تەنیا گفتوگۆ چارەسەرە و هیچی دیكە ناتوانێ ببێ بە جێگرەوەی.“
لای خۆشیەوە، سالم جومەیلی، نووسەر و سیاسەتمەدار لە عێراق، هەر سەبارەت بە پرسی لێكەوتەكانی بڕیارەكانی حكوومەتی عێراق دژ بە هەرێمی كوردستان و ئەگەری كشانەوەی كورد لە پرۆسەی سیاسیی عێراق، لە پێگەی خۆی لە تۆڕی كۆمەڵایەتیی (ئێكس) نووسیویەتی: ”كشانەوەی كورد لە پرۆسەی سیاسی هەر بەتەنیا كشانەوە و دووركەوتنەوەی پێكهاتەیەك نییە، بەڵكوو مانای كەوتنی دەستوورە، مانای رووخانی حكوومەتە، مانای داڕمانی شەرعییەتی هەڵبژاردنە.“