کاتی پڕكردنەوەی فۆڕمی كارمەندانی سەر سندووقەكانی هەڵبژاردن ڕاگەیاندرا

بەرپرسێكی كۆمسیۆن وردەكاریی پڕكردنەوەی فۆڕمی كارمەندانی سەر سندووقەكانی هەڵبژاردن ئاشكرا دەكات و دەڵێت: "هەفتەی داهاتوو فەرمانبەران و قوتابییان و دەرچوانی دانەمەزراو دەتوانن بەشێوەی ئۆنڵاین فۆڕمەكە پڕ بكەنەوە."
خالید عه‌باس، به‌رپرسی ئۆفیسی دهۆكی كۆمسیۆنی هه‌ڵبژاردنی عێراق،  رایگەیاند: "رۆژی 3ی6ی2025، فەرمانبەران و دەرچووانی زانكۆ و قوتابییان و دانەمەزراوان لە هەرێمی كوردستان، دەتوانن فۆڕم بە شێوەی ئۆنڵاین بۆ بوون بە كارمەندی سەر سندووقی هەڵبژاردنی پەرلەمانی عێراق پڕبكەنەوە."
ئاشكراشی كرد، پڕۆسەی خۆتۆماركردن ماوەی مانگێك دەخایەنێت، گوتیشی: "بەپێی زانیارییەكانمان بۆ هەرێمی كوردستان زیاتر لە 40 هەزار كارمەند پێویستە و بۆ پارێزگای دهۆكیش 10 هەزار پێویستە."
ئاماژەی بەوەش دا: "ئەمجارە شتێكی زۆر باش لە سیستەم كراوە، هەركەسێك پێشتر كاری لەگەڵ كۆمسیۆن كردبێت لە ساڵانی 2021 و 2023 و 2024، پێویست ناكات بەڵگەنامەكان بۆ ئۆفیسەكانی ئێمە بێنێت، بەڵام ئەوانەی تازەن دەبێت بەڵگەنامەكان بۆ بنكەكانی دەنگدان ببەن."
ئەو كارمەندانەی كە فەرمانبەری حكوومەت نین، 250 هەزار دینار وەردەگرن و ئەوانەیشی فەرمانبەری حكوومەتن، بڕی 150 هەزار دینار وەردەگرن.
بەپێی رێكارەكانی کۆمیسیۆنی باڵای سەربەخۆی هەڵبژاردنەکانی عێراق، جگە لە پۆلیس و سەرباز، فەرمانبەرانی حکوومەت و قوتابییانی زانکۆ و پەیمانگاکان، دەرچوانی زانکۆ دەتوانن فۆڕم پڕ بكەنەوە.
مەرجە تەمەنیان لەنێوان 19ساڵ تاوەكوو 55 ساڵیدا بێت، دەرچووی ئامادەیی بێت، کارتی دەنگدانیان هەبێت، لە هەمان شار نیشتەجێ بن