بەغدا و هەرێم لەسەر زۆربەی خاڵەکان ڕێکەوتن

حەیان عەبدولغەنی، وەزیری نەوتی عێراق بە ئاژانسی دەنگوباسی عێراق (واع)ی راگەیاندووە: ”لەم ماوەیە گفتوگۆ و دانوستانی زۆر و وردمان كردووە لەبارەی جێبەجێكردنی یاسای بودجە، هەروەها هەموارێكی یاسای بودجەش كراوە كە ١٦ دۆلار وەك تێچووی بەرهەمهێنانی نەوتی هەرێمی كوردستان دانراوە.“
ڕوونیشی كردووەتەوە: ”دیوانی چاودێریی دارایی فیدڕاڵی پێشنیاری دیاریكردنی بڕی ٤٦ هەزار بەرمیل نەوتی رۆژانە بۆ پاڵاوتن و بەكاربردنی ناوخۆییان داوە، بەڵام هەرێمی كوردستان ئێستا داوای ٦٥ هەزار دەكات. بە نزیكەیی ڕێككەوتن لەسەر هەموو بڕگەكان كراوە جگە لەم بڕگەیە.“ لەمبارەیەوە سەرچاوەیەك لە شاندی دانوستانكاری كوردستان رایگەیاند: پێویستیی رۆژانەی هەرێمی كوردستان بۆ نەوت 150 هەزار بەرمیلە، ئێمە سەرەتا داوای 150 هەزار بەرمیلمان كرد، رازی نەبوون، دواتر كردمانە 100 هەزار هەر رازی نەبوون، ئێستا داوای 65 هەزار بەرمیل دەكەین، هەر رازی نیین، ئەوان ئەو 45 هەزارەش بە هەندێ مەرجی قورسەوە دەدەن كە نەهێشتنی هەرێیم كوردستانە، بۆیە فشارەكەیان سیاسییە و پەیوەندیی بە ژمارە و داتا و كێشەی یاسایی و ئیدارییەوە نییە.