كاتی هاتووە سكاڵا لەسەر عێراق تۆمار بکرێت

وەزیری پێشووی دادی حكوومەتی ھەرێمی كوردستان رای گەیاند، لە مێژوودا لە ھیچ وڵاتێك نەبووە بەشێكی ھاووڵاتیی خۆت نانبڕاو بكەیت، ئەوە لە عێراق ڕووی دا، بۆیە كاتی ئەوە ھاتووە ھەرێمی كوردستان لەسەر ئاستی نێودەوڵەتی سكاڵا تۆمار بكات.

ئەمڕۆ دووشەم چواری ئاب، شێروان حەیدەری وەزیری پێشووی دادی حكوومەتی ھەرێمی كوردستان، رایگەیاند، دادگای فیدراڵی پرسی مووچەی فەرمانبەرانی ھەرێمی كوردستانی یەكلا كردووەتەوە و پێویستە بەغدا مووچە رەوانە بكات، بەڵام دیارە بەغدا پابەندی بڕیارەكانی دادگای فیدراڵی نابێت و بەردەوام بیانوو بەھەرێمی كوردستان دەگرێت بۆ ئەوەی مووچەی خەڵكی كوردستان رەوانە نەكات.

زیاتر گوتی، كاتی ئەوە ھاتووە ھەرێمی كوردستان لەسەر ئاستی نێودەوڵەتی سكاڵا تۆمار بكات، لە نەتەوە یەكگرتووەكان و دادگای نێودەوڵەتی و كۆمسیۆنەكانی مافی مرۆڤ لە دنیادا، چونكە ئەوە پرسێكی مرۆییە و ناكرێت قووتی شەش ملیۆن كەس لە ھەرێمی كوردستان ببڕی  كە بەشێكە لە عێراق، بۆیە ئەوكات كۆمەڵگەی نێودەوڵەتیش دێتە سەر خەت و ھەڵوێستی دەبێت .

حەیدەری گوتی، لە دەستووری عێراقیشدا ھاتووە پێویستە مافی ھەموو ھاووڵاتییانی عێراقی بە یەكسانی بدرێت بەبێ ئەوەی جیاوازی بكرێت، ئەوەی عێراقیش دەیكات جیاوازییە و تەنیا مووچەی خەڵكی ھەرێمی كوردستان رەوانە ناكات، چونكە ئەوە لە دەستووری ھەموو وڵاتان ھاتووە، بۆیە پێویستە ھەرچی بە ھاووڵاتیی عێراقی دەدرێت، بە ھاووڵاتیی ھەرێمی كوردستانیش بدرێت، بۆیە ھەرێمی كوردستان ھەر سكاڵایەك تۆمار بكات لە بەرژەوەندیی خەڵكی ھەرێمی كوردستان یەكلا دەبێتەوە، چونكە نەبووە لە ھیچ وڵاتێك نانبڕین ھەبێت، تەنیا ئەوە لە عێراق ڕووی داوە، بۆیە دەكرێت گفتوگۆ بكەن و درێژەش بكێشێت، بەڵام نەك مووچەی خەڵك ببڕن.