شەپۆلێکی خۆڵبارین بەڕێوەیە

دەستەی کەشناسیی عێراق، ئەمڕۆ پێنجشەم 14ی ئاب ڕای گەیاند کە کەشوهەوای عێراق دەچێتە قۆناغێکی گواستنەوەوە و پلەکانی گەرما لەگەڵ نزیکبوونەوەی نیوەی دووەمی مانگی ئابدا، وردە وردە پاشەکشە دەکەن. هاوکات هۆشداریش لە هەڵکردنی بایەکی بەهێز و خۆڵبارین لە ناوچەکانی ڕۆژئاوا و بەرزبوونەوەی شێ لە باشوور دەدات.

بەپێی بەیاننامەیەک کە وێنەیەکی دەست "کوردستان پڕێس" کەوتووە، دەستەکە ئاشکرای کردووە کە ئەم گۆڕانکارییانە لە چوارچێوەی شێوازێکی کەشوهەوای وەرزیی ئاساییدایە.

وردەکاریی کەشوهەوای سبەی هەینی:
سەبارەت بە وردەکاریی کەشوهەوای سبەی هەینی، پێشبینی دەکرێت بایەکی وشکی باکووری ڕۆژئاوا لە ناوچەکانی باشووری نەینەوا و ئەنبار و بەشێک لە باشووری ڕۆژئاوای وڵات هەڵبکات، کە خێراییەکەی دەگاتە 50 کیلۆمەتر لە سەعاتێ:داا. ئەمەش دەبێتە هۆی دروستبوونی شەپۆلی خۆڵبارینی خۆجێی لەو ناوچانەدا.

لەلایەکی ترەوە، لە ئێوارەی ڕۆژی هەینییەوە، بایەکە ئاڕاستەکەی لە شارەکانی باشووری وڵات، بەتایبەتی بەسڕە و میسان، دەگۆڕێت بۆ باشووری ڕۆژهەڵات و دەبێتە هۆی بەرزبوونەوەی ڕێژەی شێ، کە تا ڕۆژی یەکشەممەی داهاتوو بەردەوام دەبێت.

پێشبینییەکانی ڕۆژانی داهاتوو:
سەبارەت بە ڕۆژانی داهاتوو، دەستەکە دابەزینێکی وردە وردەی لە پلەکانی گەرمادا لە ماوەی هەفتەی داهاتوودا ئاشکرا کرد و ڕایگەیاندووە کە ئەمە نیشانەی کۆتاییهاتنی پلە گەرما 50 پلەییەکانە، جگە لە هەندێک ناوچەی باشوور نەبێت کە ڕەنگە هەندێک جار تا کۆتایی ئەم مانگە ئەو پلەیە تۆمار بکەن.