لیندسی گراهام : پشتگوێخستنی كورد هه‌ڵه‌یه‌كی مێژووییه‌

لیندسی گراهام، سیناتۆری ئەمه‌ریکا، داوا لە دۆناڵد ترەمپ، سەرۆکی ئەمه‌ریکا دەکات پاڵپشتی لە خۆپیشاندەرانی ئێران و کورد لە سووریا بکات و هۆشداری دەدات کە پشتگوێخستنیان هەڵەیەکی مێژوویی دەبێت، ئەمەش لە کاتێکدایە بڕیارە لە چەند رۆژی داهاتوودا، ئیدارەی ترەمپ دۆخی ناوچەکە  تاوتوێ بکات.
لە پۆستێکدا لەسەر تۆڕی کۆمەڵایەتیی (ئێکس)، گراهام رایگەیاند: "نزا دەکه‌م بۆ ترەمپ و تیمی ئاسایشی نیشتمانییەکەی تاوەکوو بڕیاری دروست بدەن بۆ پاراستنی ئەمه‌ریکا لەم کاتە مەترسیدارەدا." و دەڵێت "مێژوو دەریخستووە پێویستە ئەمه‌ریکا پاڵپشتی ئەو کەسانە بکات کە لەگەڵیدا وەستاون و بەرەنگاری لایەنە شەڕەنگێزەکان ببنەوە."
گراهام نووسیویەتی: "مێژوو پێمان دەڵێت ناکرێت لەگەڵ شەڕانگێزان ڕێککەوتن بکرێت، بەڵکو دەبێت تێکبشکێنرێن،" و جەختی لەوەش کردەوە نابێت هاوپەیمان و هاوبەشەکانی ئەمه‌ریکا لە ساتە پڕ لە قەیرانەکاندا بە تەنیا جێ بهێڵرێن.
ئەو سیناتۆرە کۆمارییە هێرشەکەی ساڵی ٢٠١٢ی شاری بنغازی لە لیبیا وەبیر خەڵک دەهێنێتەوە و بە توندی رەخنەی لە هیلاری کلینتۆن، وەزیری پێشووتری دەرەوەی ئەمه‌ریکا گرت و رایگەیاند، پشتگوێخستنی خەڵکەکەی لەوێ لەلایەن ئەمه‌ریکاوە هێشتا کاریگەرییەکی زۆری لەسەری هەیە. 
گراهام گوتیشی: "دەترسم هەمان ئەنجام ڕوو بدات ئەگەر واشنتن پشت لەوانە بکات کە ئەمڕۆ دژی ستەمکاری دەوەستنەوە”.
ئه‌وه‌شی خستووته‌ ڕوو: "دەبێت خەڵکی ئێمە ئەو کەسانەش بگرێتەوە کە لە بەرامبەر ستەمکاریدا دەبنە دۆستی ئەمه‌ریکا، وەک خۆپیشاندەرانی ئێران و کوردە ئازاکان."
گراهام هۆشداری دا پشتگوێخستنی گەلی ئێران و کورد وەک "ملیۆنێک جار گەورەتر لە کارەساتی بنغازی" دەبێت، و جەختی لەسەر تێڕوانینی خۆی کردەوە کە متمانەی ئەمه‌ریکا و بەرپرسیارێتی ئەخلاقی وڵاتەکە لە مەترسیدایە.
لە کۆتاییدا گراهام متمانەی خۆی بە ترەمپ دەربڕی و ستایشی کرد و رایگەیاند، پێیوایە لە کۆتاییدا ترەمپ بڕیارە دروستەکە دەدات.