شەپۆلێکی بەفرو باران هەرێمی کوردستان دەگرێتەوە

به‌ڕێوه‌به‌رایه‌تی‌ كه‌شناسی‌ سه‌ر به‌ وه‌زاره‌تی‌ گواستنه‌وه‌ی‌ هه‌رێم‌ رایگه‌یاند كه‌ له‌مڕۆوه‌ به‌فر و باران بارین ده‌ستپێده‌كاته‌وه‌ و و پله‌كانی‌ گه‌رما نزم ده‌بنه‌وه‌.

به‌ڕێوه‌به‌رایه‌تی‌ كه‌شناسی‌ هه‌رێم له‌ راگه‌یه‌ندراوێكدا ئاماژه‌ی‌ به‌وه‌دا كه‌ "ئه‌مڕۆ چوارشه‌ممه‌ 28ی‌ كانوونی دووه‌می‌ 2026 له‌ كاته‌كانی  نیوه‌ڕۆی ئه‌مڕۆ چوار شه‌ممه‌  كاریگه‌ری شه‌پۆلێكی باران بارین روو له‌ ناوچه‌كه‌مان ده‌كات. سه‌ره‌تا له‌ سنووری پارێزگای دهۆك ده‌ست پێده‌كات پاشان درێژ ده‌بێته‌وه‌ بۆ سه‌ر سه‌رجه‌می ناوچه‌ جیا جیاكان، له‌گه‌ڵ باران بارین ناوچه‌ سنوورییه‌كان و لووتكه‌ و قه‌دپاڵی چیا به‌رزه‌كان به‌ تایبه‌ت ئه‌و چیا به‌رزانه‌ی 1500 مه‌تر به‌رزترن له‌ ئاست رووی ده‌ریا به‌فر بارینی ده‌بێت. له‌ دوای نیوه‌ڕۆ كاریگه‌ری ئه‌و شه‌پۆله‌ زیاد ده‌كات و باران بارین به‌ شێوه‌ی بارانی مامناوه‌ند و هه‌ندێ ناوچه‌ی سنووری ئیداره‌ی زاخۆ و پارێزگای دهۆك و سنووری پارێزگای سلێمانی و چه‌مچه‌ماڵ و باكووری پارێزگای كه‌ركوك و ئیداره‌ی گه‌رمیان ناوچه‌ شاخاوییه‌ به‌رزه‌كانی سنووری پارێزگای هه‌ولێر ڕێژه‌ی باران بارینی به‌ شێوه‌ی لێزمه‌ بارانی كورت خایه‌ن و هه‌وره‌ تریشقه‌شی ده‌بێت".