بەغدا ٨٠ ملیار دینار کەمتر لە پارەی مووچەی ناردووە و دارایی هەرێمیش بە قەرز کورتهێنانەکە پڕ دەکاتەوە
کوردستان پرێس: وەزارەتی دارایی و ئابووریی حکومەتی هەرێمی کوردستان ڕاگەیەنراوێکی سەبارەت بە ناردنی مووچەی مانگی ئایار و کێشەی کورتهێنانی بودجەکە لەلایەن بەغداوە بڵاوکردەوە، هاوکات کات و شێوازی دابەشکردنی مووچەی پێش جەژنی ڕوون کردەوە.
تەوەرە سەرەکییەکانی ڕاگەیەنراوەکە:
پێشەکەی داهاتی نانەوتی: سەرەڕای ئەوەی هێشتا مانگی ئایار کۆتایی نەهاتووە، وەزارەتی دارایی هەرێم بڕی ٥٠ ملیار دیناری وەک نیوەی داهاتی نانەوتیی ئەم مانگە لە ڕۆژی ٢٥ی ئایاردا خستووەتە سەر هەژماری حکومەتی فیدراڵ بۆ ئەوەی هیچ بیانوویەک بۆ دواخستنی مووچە نەمێنێت.
کورتهێنانی پارەی نێردراو لە بەغداوە: لە کۆی ٩٧٠ ملیار و ٧٤١ ملیۆن دیناری شایستەی مووچەی مانگی ئایار، وەزارەتی دارایی عێراق لە کاتی کۆتاییهاتنی دەوامی فەرمیدا تەنها ٨٩٠ ملیار و ٥٠٢ ملیۆن دیناری ناردووە. ئەمەش واتا بەغدا زیاتر لە ٨٠ ملیار دینار کەمتر لە بڕی پێویست هەناردە کردووە.
پڕکردنەوەی کورتهێنانەکە: وەزارەتی دارایی هەرێم بڕیاریداوە ئەو کورتهێنانە ٨٠ ملیار دینارییە لە ڕێگەی وەرگرتنی قەرزەوە پڕ بکاتەوە بۆ ئەوەی هیچ مووچەخۆرێک بەرلەجەژن بێبەش نەبێت.
دەستپێکردنی دابەشکردنی مووچە: دابەشکردنی مووچە لە دوانیوەڕۆی ئەمڕۆ سێشەممە (٢٦ی ئایار) دەستپێدەکات. پرۆسەکە لە ڕۆژانی جەژندا لە دوای کاتژمێر ١٠:٠٠ی بەیانییەوە بەردەوام دەبێت (چ بەشێوازی کاش و چ لە ڕێگەی "هەژماری من").
کاتی سەردانیکردنی بانکەکان: * ئەو مووچەخۆرانەی بەشێوازی کاش مووچە وەردەگرن، لە کاتژمێر ٥:٠٠ی ئێوارەی ئەمڕۆوە دەتوانن سەردانی بانکەکان بکەن.
ئەو مووچەخۆرانەی لە ڕێگەی "هەژماری من"ەوە مووچە وەردەگرن، لە کاتژمێر ٣:٠٠ی دوانیوەڕۆوە دەتوانن لە ڕێگەی ئامێرەکانی ATM پارەکانیان ڕابکێشن.
هەر فەرمانبەرێک نەتوانێت لەم سێ ڕۆژەدا مووچەکەی وەربگرێت، سەرەتای هەفتەی داهاتوو لەگەڵ دەستپێکردنەوەی دەوام دەتوانێت سەردانی بانک بکات.
#Kurdisranpress
وەڵام بدەوه