مووچەیان هاوتای عێراق دەکرێت

عەبدوڵا حاجی مەحموود وەزیری كاروباری شەهیدان و ئەنفالكراوانی حكوومەتی هەرێمی كوردستان و عەبدولئیلا وائیلی سەرۆكی دەزگای شەهیدانی عێراق یاداشتێكییان واژوو كرد و بە گوێرەی یاداشتەكە، لەمەودوا مووچەی كەسوكاری شەهیدانی هەرێمی كوردستان هاوتای عێراق دەكرێت.
عەبدوڵا حاجی مەحموود وەزیری كاروباری شەهیدان و ئەنفالكراوانی حكوومەتی هەرێمی كوردستان رای گەیاند، ئەو لێكتێگەیشتنەی ئەمڕۆ لەگەڵ دەزگای شەهیدانی عێراق واژوو كرا دەبێتە سەرەتایەكی گرنگ بۆ پشتیوانی لە ماف و شایستەكانی كەسوكاری شەهیدان.
لای خۆیەوە عەبدولئیلا وائیلی سەرۆكی دەزگای شەهیدانی عێراق رای گەیاند، ئامانج لە رێككەوتنەكە كاركردنی هاوبەش و ئاسانكارییە بۆ راییكردنی مامەڵەی كەسوكاری شەهیدان، هەروەها ئاشكراكردنی گۆڕە بەكۆمەڵەكان و دروستكردنی سیستمێكی ئەلكترۆنیی هاوبەش، لەگەڵ هەوڵدانی بەردەوام بۆ ناساندنی تاوانەكانی ئەنفال و كیمیابارانی هەڵەبجە لەسەر ئاستی نێودەوڵەتی.