کاتی دابەشکردنی نەوتی ماڵان ئاشکراکرا

پارێزگاری هەولێر ڕایدەگەیێنێت، وەزارەتی نەوتی عێراق بەڵێنی داوە سەرەتای مانگی داهاتوو (واتە لە دوو هەفتەی داهاتوو) نەوتی سپیی ماڵان بۆ هەرێمی كوردستان ڕەوانە بكات، لەگەڵ گەیشتنی نەوتەكە، سەرەتا لە ناوچە شاخەوییەكان دابەش دەكرێت.
ئومێد خۆشناو، پارێزگاری هەولێر ڕایگەیاند، هەردوو وەزارەتی سامانە سروشتییەكان و وەزارەتی نەوتی عێراق لە گفتوگۆدان بۆ ئەوەی بەغدا لە نزیكترین كاتدا نەوتی سپی بۆ هەرێمی كوردستان بنێرێت.
وتیشی، وەزارەتی نەوتی عێراق بەڵێنی داوە لە سەرەتای مانگی داهاتوو نەوت بۆ هەرێمی كوردستان بنێرێت، لەگەڵ گەیشتنی نەوتەكە، دەستبەجێ دەست بە دابەشكردنی دەكرێت.
پارێزگاری هەولێر ئاماژەی بەوەشكرد، سەرجەم پارێزگا و ئیدارە سەربەخۆكان ئامادەكاریی پێویستیان كردووە بۆ دابەشكردنی نەوت لە زووترین كاتدا.