هەموارکردنی دەستور لە غیابی یەکگرتوویی کورد

هەموارکردنی دەستور لە غیابی یەکگرتوویی کورد
بێگومان ئامادەیی بەهێزو یەکپارچەی کورد لە بەغدا زامنی پاراستن و بەرگری کردنە لە ماف و داخوازیەکانی کورد. پێچەوانەی ئەمەش هەر جۆرە ناکۆکی و ململانێ و دژایەتی کردنی یەکتری لە لایەن هێزەکوردیەکانەوە، بە زیان بۆ هەرێم و ماف و داخوازیەکانی کورد دەشکێتەوە. 
کورد دەبێ لەوە تێبگا عێراق هێشتا قۆناغەکانی ساڵانی داخراوی رابردووی تێنەپەڕاندووە. هێزە سیاسیە عێراقیەکان بە داخەوە هێشتا خۆیان لە چنگ فکری بەغدایەکی بەهێز رزگارنەکردووەو پێیان وایەپاراستنی یەکپارچەیی عێراق لەسەرووی هەموو پرۆژەیەکی دەستوری و فیدڕاڵیە. جگە لەمەش جۆری مامەڵەکردنیان بە پرسی دەستورو فیدڕاڵی و هەرێمی کوردستان،  زادەی عەقڵیەتێکی کۆنەپەرەستانەی تائیفی و ماوەبەسەرچووە. 
بێگومان ئامادەیی بەهێزو یەکپارچەو یەکرەنگی هێزە کوردیەکانی لە بەغدا دەتوانێ فاکتەرێکی یارمەتیدەرو هێزێکی مەعنەوی سیاسی و دیپلۆماسی و گوشارێکی بەهێز بێت بۆ پاراستنی ماف و خواست و تایبەتمەندیەکانی هەرێمی کوردستان و هەڵدانەوەو لاپەڕەو دەسپێکی تازە، بۆ جێ بەجێ کردنی دەستور و یاسا، لە پێناو ئارامی و سەقامگیری و شەفافیەت و خوشگوزەرانی سەرجەم گەلانی عێراق، بە هەرێمی کوردستانیشەوە. 
جگەلەمە هەر جۆرە ناکۆکی و دووبەرەیی و سێ بەرەیی و گرێدانی سەفقاتی نهێنی بۆ پاراستنی بەرژەوەندیە شەخسیەکان، هەوڵێکە بۆ بچوک کردنەوەی هەرێم و یەکپارچەیی و بەرژەوەندیە باڵا نیشتیمانی و نەتەوەییەکانی هەرێمی کوردستان.