دوای بەرزبوونەوەی بەهای دۆلار چەندین مارکێت سزا دراون

بە هۆی بەرزبوونەوەی بەهای دۆلارەوە، ژمارەیەک بازرگان و خاوەن مارکێت نرخی شتومەکیان بەرز کردووەتەوە، بەڕێوەبەری گشتیی بازرگانییش دەڵێت، بەردەوام لە گەڕانداین و چاودێریی نرخی شتومەک و بازاڕ دەکەین، هەر لەو ماوەیەشدا چەندین مارکێت و دوکانمان داخستوون و سزا دراون.
نەوزاد شێخ کامیل، بەڕێوەبەری گشتیی بازرگانی، بە ماڵپەڕی فەرمیی پارتی دیموکراتی کوردستانی ڕاگەیاند: "بەڕێوەبەرایەتیی چاودێریی بازرگانی، سەر بە وەزارەتی گشتیی بازرگانی و پیشەسازییە و یەکێک لە لایەنە پەیوەندیدارەکانە بۆ کۆنتڕۆڵکردنی نرخ و کوالیتی شتومەک و خۆراک لە بازاڕدا، کە پێویستە فرۆشتنی کاڵاکان بە شێوازێک بێت هەم کوالیتییان بەرز بێت و هەمیش بەسەرچوو نەبن، دیارە کە بە بەردەوامی لە بازاڕداین لە گشت شارەکانی کوردستان، ئەم بەردەوامبوونەشمان بۆ ئەوە نییە کە بەس بۆ دیکۆر بێت، بەڵکوو بە کردار کارمان کردووە و لە ساڵی ڕابردوودا "٢٠٢٢" توانیمان زیاتر لە ٤٤٨ خۆراکی ماوەبەسەرچوو دەست بەسەردا بگرین و زیاتر لە پێنجسەد و ٢٩ ملیۆن دینار غرامەی خەڵکمان کردووە، کە سەرپێچییان لە ڕێنماییەکان کردووە، هەروەها زیاتر لە ٥٠ هەزار سەردانمان کردووە بۆ هەموو مارکێت و مۆڵەکان لە شارەکانی کوردستان و زیاتر لە ١٨٠٠ سەرپێچیمان تۆمار کردووە و زیاتر لە ٢٠٠ تا ٣٠٠ دوکان و مارکێتمان داخستووە، هەموو ئەمانەش ئەوەمان پێ دەڵێن کە ئێمە لە ڕابردوودا بەردەوام بووین و لەنێو بازاڕ بووین بۆ چاودێریکردنی نرخی شتومەک لە بازاڕدا."
بەڕێوەبەری گشتیی بازرگانی، سەبارەت بە بەرز و نزمیی نرخی دۆلار دەڵێت: "لە ئێستادا کە ئەم بارودۆخە هاتووەتە پێشەوە، لەسەر هێڵین و ڕۆژانە لیژنەکانمان لەنێو بازاڕدان، دیارە گۆڕانکاری لە نرخی هەندێک کاڵا و شتومەک و خۆراک ڕووی داوە و هۆکارەکەشی بۆ بەرزبوونەوەی نرخی دۆلار دەگەڕێندرێتەوە، کە بازرگانەکان هەندێکیان بەقەرز شتومەک دەکڕن و دەبێت بە نرخی ئێستا قەرزەکە بدەنەوە، بۆیە ئێستا چاودێریی ئەم نرخانە دەکەین و گەر بزانین کاڵایەک نرخەکەی زیاد لە پێویست بەرز بووەتەوە، بە دڵنیاییەوە سەیری مەنەفێستی ئەم کاڵایە دەکەین، ئەگەر پێش بەرزبوونەوەی نرخی بەهای دراو بێت، ئێمە لێپێچینەوەی لەگەڵدا دەکەین و ڕێگە نادەین هیچ کاڵایەک نرخەکەی بەرز ببێتەوە، بۆیە هەر بەرزبوونەوەیەکیش ببێت بەهەر هۆکارێک، ڕێگە نادەین نرخەکەی تێپەڕێنن لەوەی دیاری کراوە".
شێخ کامیل ئاماژەشی دا: "چەند ڕۆژێکە لە دوای ئەم بەرزبوونەوەی بەهای دۆلارە بەردەوام گەڕاوین و سزای چەندین مارکێتمان داوە و ڕێگە نادەین هەل بقۆزنەوە، چونکە پێشتر بە نرخێکی هەرزانتر کاڵاکەیان هێناوە و ئێستا دەیانەوێ بەم نرخە بەرزی بکەنەوە چونکە ڕۆژانە نرخ وەردەگرین و هەر مارکێت و دوکاندار و بازرگانێک نرخەکەی زیاد لە پێویست بەرز بکاتەوە، شوێنەکەی دادەخەین و سزا دەدرێت."