سەرمایەکی سەخت و بەفر بەڕێوەیە

کەشناسیی هەرێمی کوردستان پێشبینییەکانی بۆ سبەی دووشەممە بڵاوکردەوە و رایگەیاند، ئاسمان ساماڵ دەبێت. کەشناسێکیش دەڵێت، سەرەتای هەفتەی داهاتوو شەپۆلێکی بەفر و باران هەرێمی کوردستان دەگرێتەوە و سەرمایەکی "سەخت" دەستپێدەکات.
 
رۆژی یەکشەممە، 22-1-2023، محەممەد کەمال، شارەزای کەشناسی گوتی: "لە 28ـی ئەم مانگەوە شەپۆلێکی سەرمای سەخت روو لە هەرێمی کوردستان دەکات و باران و بەفر دەبارێت، شەپۆلەکەش بۆ ماوەی نزیکەی هەفتەیەک ناوبەناو بەردەوام دەبێت".
 
بەگوتەی محەممەد کەمال، شەپۆلەکە لە ئەنجامی کاریگەریی نزمە پاڵەپەستۆیەکی بەهێزی دەریای نێوەڕاستە. گوتیشی: "بەگوێرەی نوێترین پێشبینیی، لەو شەپۆلەدا بەفر لە سەنتەری شارەکانی سلێمانی و هەڵەبجە دەبارێت، لە هەولێر بارانی باش دەبارێت و بەفر بشبارێت کەم دەبێت؛ لە دەوروبەری دهۆکیش بەفری زۆر دەبارێت و لەنێو شارەکەدا کەم دەبێت و تێکەڵی باران دەبێت".
 
هەر ئەمڕۆ یەکشەممە، ئاراس جەبار، شارەزای کەشناسی گوتی، 28ـی ئەمە مانگە شەپۆلەکە سەرەتا بە لاوازی دەستپێدەکات و باران لە هەموو شارەکان دەبارێت. گوتیشی: "پلەی گەرما کەمێک نزمتر دەبێتەوە و خێرایی با چالاک دەبێت بەتایبەت لە سنووری سلێمانی و، وشکە سەرما ناوچەکە دەگرێتەوە؛ بۆ هەموو پێشبینییەکانیش ئەگەری گۆڕانکاریی هەیە".
 
ئەمڕۆ کەشناسیی هەرێمی کوردستان پێشبینییەکانی بۆ کەشوهەوای سبەی بڵاوکردەوە و رایگەیاند، سبەی ئاسمان ساماڵ دەبێت و پلەی گەرما نزیک دەبێتەوە لە تۆمارکراوەکانی ئەمڕۆ.
 
بەگوێرەی کەشناسیی هەرێمی کوردستان، بەرزترین پلەی گەرمای پێشبینیکراو بۆ سبەی دووشەممە بەمشێوەیەی خوارەوە دەبێت:
 
- هەولێر؛ 18 پلەی سیلیزی
- سلێمانی؛ 15 پلەی سیلیزی
- دهۆک؛ 16 پلەی سیلیزی
- کەرکووک؛ 19 پلەی سیلیزی
- هەڵەبجە؛ 16 پلەی سیلیزی
- زاخۆ؛ 17 پلەی سیلیزی
- سۆران؛ 15 پلەی سیلیزی
- گەرمیان؛ 20 پلەی سیلیزی