لیزا فەلەکەدین کاکەیی، یاریدەدەری بەرپرسی مەکتەبی رێکخستنی کەرکوک - گەرمیانی پارتی دیموکراتی کوردستان رایگەیاند، پارتی ئامادەکاری بۆ هەڵبژاردنی ئەنجوومەنی پارێزگاکان کردووە و بە لیستێکی سەربەخۆش بەشدار دەبێت، بەڵام ئەمە ئەوە ناگەیێنێت، لە داهاتوودا هاوپەیمانی پێکنەهێنین.
لیزا فەلەکەدین کاکەیی سەبارەت بە پرۆسەی بەعەرەبکردن، گوتی: پرۆسەی بەعەرەبکردنی ناوچەکانی سنووری کەرکووک بە چەند هەنگاوێک دەستیپێکردووە، چڕترین کاتی ئەنجامدان و جێبەجێکردنی ئەم پرۆسەیە، لەنێوان ساڵەکانی 1975 تاوەکو 2003 بووە، کە ئەوکاتە رژێمی بەعس هەوڵیداوە، لەرێگەی وەرگرتنەوەی تاپۆی زەوی کوردان و تورکومانەکان، و پێدانی ئەو تاپۆیانە بە عەرەبە هاوردەکان، دیموگرافیای ناوچەکە بگۆڕێت.
ئاماژەی بەوەشدا، لە سەردەمی رژێمی بەعسدا، نزیکەی ملیۆنێک و 200 هەزار دۆنم زەوی لە کورد و تورکمانەکان وەرگیراوەتەوە و دراوەتە ئەو عەرەبانەی لە باشوور و ناوەڕاستی عێراق هێنراونەتە ناوچەکە.
لیزا فەلەکەدین راشیگەیاند، قۆناغی دواتری پرۆسەی بەعەرەبکردن، لەدوای خیانەتی 16ـی ئۆکتۆبەری 2017 دەستیپێکرد، کە ئەو عەقڵە شۆڤێنیەی بەردەوام هەوڵی گۆڕینی دیمۆگرافیای ناوچە کوردستانییەکانی داوە، ئەمجارە سوپا و چەکدارەکانی حەشدی شەعبی بەکارهێناوە بۆئەوەی زەوی جوتیارە کورد و تورکمانەکان بداتە عەرەبە هاوردەکان.
بە گوتەی یاریدەدەری بەرپرسی مەکتەبی رێکخستنی کەرکوک - گەرمیانی پارتی، ئەم پرۆسەیە تەنیا لەرێگەی سوپا و حەشدەوە نەکراوە، بەڵکو بە پاڵپشتی پارێزگاری بەزۆر سەپێندراوی کەرکووک ئەنجام دراوە و، هێشتا فشاری بەعەرەبکردن لە ناوچەکە بەردەوامە.
لیزا فەلەکەدین گوتیشی: دوای دەستێوەردانی سەرۆک بارزانی لە باباتەکە، فشارەکانی بەعەرەبکردن کەمتر بوونەتەوە، بەڵام هێشتا مەترسی ماوە.
وەڵام بدەوه