دوای ئەوەی هەفتەی رابردوو كۆشكی سپی رای گەیاند كە دۆناڵد ترەمپ سەرۆكی ئەمەریكا لە ماوەی دوو هەفتەی داهاتوو بڕیاری یەكلاكەرەوە سەبارەت بە هێرشكردنە سەر ئێران دەدات، ئەمڕۆ شەش فڕۆكەی جۆری بی-2 لە ئەمەریكاوە بەرەو ناوچەكە جووڵێنران، بەرپرسانی ئەمەریكا دەڵێن هێشتا فەرمانیان بۆ هێرشكردنە سەر ئێران بۆ نەهاتووە.
ماڵپەڕی "زە ئافیشنست"ی سەربازی ئەمەریكی رای گەیاند كە دوو كۆمەڵەی بۆمبهاوێژی جۆری بی-2 بنكەی ئاسمانیی وایتمانیان لە ویلایەتی میزووری لە ئەمەریكا جێهێشتووە، بەپێی رۆژنامەی "وۆڵ ستریت جۆرناڵ"یش، بەرپرسانی ئەمەریكا ئاشكرایان كرد كە تا ئێستە فەرمانیان بۆ هێرشكردنە سەر ئێران بەو بۆمبهاوێژانە پێ نەگەیشتووە، بەڵام جووڵاندنیان راستە.
هاوكات لەگەڵ جووڵاندنی ئەو بۆمبهاوێژانە هەوڵێك بۆ كۆبوونەوەی بەرپرسانی ئەمەریكا و ئێران لە ئیستەنبووڵ بە میانگیریی توركیا هەیە، لە هەوڵێكی هاوبەشی نهێنیی ترەمپ و ئەردۆغان، بەڵام هەوڵەكان بەهۆی بەدەستنەهێنانی رەزامەندیی عەلی خامنەیی رابەری باڵای ئێران تا ئێستە شكستی هێناوە، ئەوە لەوكاتەی بڕیارە ئەمڕۆ ترەمپ كۆبوونەوەیەك لەگەڵ تیمی ئەنجوومەنی ئاسایشی ئەمەریكا لە كۆشكی سپی ساز بكات بۆ تاوتوێكردنی شەڕی نێوان ئیسرائیل و ئەمەریكا.
وەڵام بدەوه