بنیامین ناتانیاهو : ڕۆژهەڵاتی ناوەڕاست دەگۆڕین

سەرۆک وەزیرانی ئیسرائیل ڕایگەیاند گورزی توندیان لە ئێران وەشاندووە و سەرلەنوێ جەخت لە گۆڕینی ڕۆژهەڵاتی ناوەڕاست دەکاتەوە.


ئەمشەو بنیامین ناتانیاهو، سەرۆک وەزیرانی ئیسرائیل ڕایگەیاند،  هێزەکانی سوپا و مۆساد لەئۆپەراسیۆنی هەستانەوەی شێردا، کردەوەی قارەمانانە ئەنجام دەدەن.
وتیشی،  سوپاسی سەرۆک ترەمپ دەکەین بۆ هەوڵە هاوبەشەکانی و لەگەڵ ئەمریکا دەستکەوتی بێوێنەمان بەدەستهێنا و سوپاسی دۆستی گەورەمان ترەمپ دەکەین بۆ ئەو کارە شەرەفمەندانەی سوپای ئەمریکا لە گەیاندنی زیانێکی زۆر بە دامەزراوەی فۆردۆ.
ناتانیاهو ڕاشیگەیاند، ” وتم ڕۆژهەڵاتی ناوەڕاست دەگۆڕین، ئەمڕۆش هەر ئەوە دەکەین” و زۆر نزیکین لە گەیشتن بە ئامانجەکانی شەڕی ئێران.
ئەوەشی ختسەڕوو کە  ئێران دەیەوێت لەناومان ببات، ئێمەش زۆر نزیکین لە نەهێشتنی توانا ئەتۆمی و مووشەکییەکانی.
سەبارەت بە هێرشەکانیش وتی: “ئێمە پێشوەختە کۆتایی بە ئۆپەراسیۆنەکەمان ناهێنین و زیاتر لەپێویستیش درێژەی پێنادەین”.
ناتانیاهو ڕاشیگەیاند،  هەڵسەنگاندن بۆ بابەتەکان دەکەین و کاردەکەین بۆ دڵنیابوون لەوەی کە دامەزراوەی فۆردۆ هیچ مەترسییەک بۆ سەر ئێمە دروست نەکات.
وتیشی: “ئۆپراسیۆنەکانمان بۆ سەر ئێران زیاتر لەگەیشتن بە ئامانجەکانمان لە غەززە نزیکمان دەکاتەوە”.
سەرۆک وەزیرانی ئیسرائیل ڕاشیگەیاند، ئێران، بە وێرانکردنی دامەزراوە ئەتۆمییەکانی و کوشتنی زاناکانی گورزی توندی بەرکەوتووە و ئێمەش بەئیرادەین بۆ تەواوکردنی ئەو ئەرکە.