ئێران کامێراكانی چاودێریى سه‌ر به ئاژانسی وزەی ئەتۆمی لە دامەزراوە ئەتۆمییەکان لابرد
ئیسماعیل كه‌وسه‌رى، ئەندامی کۆمیتەی ئاسایشی نیشتمانی و سیاسەتی دەرەوەی پەرلەمانی ئێران ڕایگەیاند، وڵاتەکەی کامێرای چاودێریی سه‌ر به ئاژانسی نێودەوڵەتی وزەی ئەتۆمی لە دامەزراوە ئەتۆمییەکانی لابردووە، ئەمەش وەک جێبەجێکردنی بڕیارێکی ئەم دواییەی پەرلەمانی ئێران.
ئیسماعیل که‌وسەری، لە ڕاگه‌یاندراوێكدا کە ئاژانسی هەواڵی تەسنیمی ئێرانی بڵاوی كردووه‌ته‌وه، ده‌ڵێت: "ئەم هەنگاوە بەشێکە لە یاسایەک کە لە لایەن پەرلەمانی ئێرانەوە دەرچووە و لە ژێر ڕۆشنایی ئەوەی کە بە ڕەفتاری لایەنگری و ناپڕۆفیشناڵانەی ڕافائیل گرۆسی، بەڕێوەبەری گشتیی ئاژانسی نێودەوڵەتی وزەی ئه‌تۆمی وەسفی کردووە، هاوکاری لەگەڵ ئەو ئاژانسە سنووردار دەکات.
ئه‌و ئەندامه‌ی کۆمیتەی ئاسایشی نیشتمانی و سیاسەتی دەرەوەی پەرلەمانی ئێران، گوتیشی: "بەداخەوە گرۆسی ئەو زانیاریانەی کە لە سەردانەکانی بۆ تاران بەدەستی هێنابوو لەگەڵ ئەمریکییەکان و ئیسرائیل هاوبەش کرد و ئەمەش بووە هۆی لەدەستدانی متمانە و ڕاگرتنی هاوکاری لەگەڵ ئەو دەزگایە کە خرایە کارنامەی پەرلەمانەوە.
لە ٢٤ی حوزه‌یرانى 2025، پەرلەمانی ئێران دەنگی دا بە ڕاگرتنی هاوکاری لەگەڵ ئاژانسی نێودەوڵەتی وزەی ئەتۆمی و ڕایگەیاند کە هەر دەستڕاگەیشتنێکی داهاتوو بۆ پشکنەران بە مەرجی ڕەزامەندی ئەنجومەنی باڵای ئاسایشی نیشتمانی و دەستەبەرکردنی ئاسایشی دامەزراوە ئەتۆمییەکانی ئاشتیانە دەبێت.
وەڵام بدەوه