چەند رۆژێكە ناكۆكی و ململانێكان لە سووریا گەرمە، لە پارێزگای سویدا شەڕ و پێكدادانی چەكداری لە نێوان چەكدارە درووزەكان و خێڵەكانی ناوچەكە دروست بوو، بۆ شەڕ لە نێوان ئەوان و هێزە تەناهییەكانی دیمەشق سەری كێشا و دواتر حكوومەتی دیمەشق بە هێزی سەربازی دۆخەكەی یەكلا كردەوە، ئەمڕۆ رووبەڕووبوونەوەی لە نێوان ئەندامانی هەسەدە و ئاسایشی گشتیی حكوومەتی سووریا لە پارێزگای حەلەب دروست بوو.
وەك روانگەی مافی مرۆڤی سووریا بڵاوی كردەوە، دەشتایی دێر حافز لە رۆژهەڵاتی پارێزگای حەلەب ئەویش ئاڵۆزی تەناهی بەخۆیەوە بینی، ئەوجارەیان لە نێوان ئەندامانی هەسەدە و ئەندامانی ئاسایشی گشتیی سەر بە حكوومەتی دیمەشق، تەقەكردنێكی پچڕ پچڕ دروست بوو، كاتێك ئاسایشی گشتیی حكوومەتی سووریا بێ ئاگەداركردنەوەی هەسەدە ویستیان بچنە ناوچەكە.
ئەو پەرەسەندنەی ئەمڕۆ یەكەمینە لە دوای گفتوگۆكانی هەفتەی رابردووی دیمەشق لە نێوان هەسەدە و خۆسەریی رۆژئاوا و نوێنەرانی حكوومەتی سووریا بە سەرپەرشتیی نێردراوی ئەمەریكا بۆ سووریا، كە دووپات لە جێبەجێكردنی بڕگەكانی رێككەوتانە هەشتخاڵییەكەی دیمەشق لە نێوان ئەحمەد شەرع و مەزڵووم عەبدی لە ئازاری رابردوو كرایەوە.
وەڵام بدەوه