ئاماژەکان لە زیادبووندان.. ئیسرائیل خۆی بۆ "شەڕێکی درێژخایەن" دژی ئێران ئامادە دەکات
ئیسرائیل بەردەوامە لە ناردنی ئاماژەی ڕوون لەسەر نیازی بۆ دەستپێکردنی گەڕی دووەمی شەڕ دژی ئێران، ئه‌مه‌ش دوای لێدوانەکانی ئەڤیگدۆر لیبەرمان، وەزیری پێشووی بەرگری، کە پێشبینی کردبوو ڕووبەڕووبوونەوەی نێوان هەردوو وڵات لە ماوەی ساڵ و نیوێکدا نوێ ببێتەوە، سەرچاوەکان لە تەلئەبیبەوە ئاشکرایان کردووە کە دەست بە ئامادەکاری کراوە بۆ "ئۆپەراسیۆنێکی درێژخایەن".
ماڵپەڕی "ئەلمۆنیتۆر"ی ئەمریکی لە زاری وەزیرێکی باڵای ئیسرائیلی گواستوویەتییەوە، "سەرکەوتنە ڕوون و له‌ناوبه‌ره‌كه" کە تەلئەبیب دژی تاران بەدەستی هێناوە "یەکلاکەرەوە نەبوو"، و ئاشکرای کردووە کە ئەمە "سەرەتای ئۆپەراسیۆنێکی درێژخایەنە".
وەزیرەکە کە ڕەتیکردەوە ناوی ئاشکرا بکرێت، گوتیشی: "ئیسرائیل ئاماده‌كارى بۆ هەنگاوی داهاتوو دەکات"، لە کاتێکدا کە گرووپی سێ وڵاتە ئەوروپییەکە خۆیان بۆ گفتوگۆکانی ئەتۆمی ئێران ئامادە دەکەن، کە بڕیارە ڕۆژی هەینی لە ئەستەنبوڵ بەڕێوەبچێت.
ئیسرائیل پێیوایه، ئێران لەوانەیە هێشتا توانای ئەوەی هەبێت کە بەشی پێویست لە تواناکانی خۆی بگەڕێنێتەوە بۆ ئەنجامدانی تاقیکردنەوەیەکی ئەتۆمی لە شوێنێکی بیاباندا یان دروستکردنی بۆمبێک کە تەقەمەنی ئاسایی و ماددەی تیشکدەر تێکەڵ دەکات.
لەلایەکی دیکەوە، بەرپرسێکی ئەمنی ئیسرائیلی ڕایگەیاند کە ئێران لە ئێستادا ڕووبەڕووی کێشەی لەدەستدانی توانای ڕێگری بووەتەوە دوای شەڕی 12 ڕۆژەی مانگی حوزەیرانی ڕابردوو، بەڵام لە هەمان کاتدا هۆشداریدا کە تاران لە ئێستادا بەدوای "گەڕاندنەوەی توانای بەرگری" خۆیدا دەگەڕێت، و پێشبینی کرد کە ئێرانییەکان لەوانەیە "پەلە بکەن بەرەو پەرەپێدانی بۆمبی ئەتۆمی".
سەرچاوە ئیسرائیلییەکە به‌دووری نەزانی کە ئێرانییەکان هەوڵی کڕینی بۆمبێک لە کۆریای باکوور بدەن، و مەترسییەکانی پەرەپێدانی بەرنامەی مووشەکە بالیستییەکانیشی خستە سەر "کە به گوته‌ى خۆى، پێناچێت وازی لێ بهێنن".
هەروەها لیبەرمان لە لێدوانێکیدا بۆ ماڵپەڕی "Al-Monitor" جەختی لەوە کردەوە کە پێویستە ئیسرائیل خۆی بۆ ڕووبەڕووبوونەوەی داهاتوو لەگەڵ ئێران ئامادە بکات، کە پێشبینی دەکرد لە ماوەی ساڵ و نیوێکدا هەڵبگیرسێت، و دووپاتی کردەوە کە ئێران بە ڕوونی سوورە لەسەر زیندووکردنەوەی بەرنامە ئەتۆمییەکەی.
سەرۆکی پارتی ئۆپۆزسیۆنی "ئیسرائیل ماڵمانە" كه حزبێكى نه‌ته‌وه‌یی توندڕه‌وه وایبینی کە "هەموو ئەوەی لە ئێستادا بیری ئێران داگیرکردووە، دەستپێکردنی شەڕێکی تۆڵەسەندنەوەیە دژی ئیسرائیل"، و ئاماژەی بەوەدا کە ڕووبەڕووبوونەوەی داهاتوو ئامانجێکی هاوبەشی هەردوو لایەنە، و جەختی کردەوە کە هەڵسەنگاندنەکانی لەسەر بنەمای "سەرچاوە کراوەکانە، نەک زانیاری هەواڵگری نهێنی".
لیبەرمان نیگەرانی خۆی دەربڕی سەبارەت بە هاوکاری ئەمنی ئەگەریی نێوان ئێران و چین و کۆریای باکوور، و ئەگەری کڕینی پاتری بەرگری مووشەکی لەلایەن ئێرانەوە لە پەکین یان پێکهاتەی مووشەکی بالیستی لە پیۆنگیانگ، هه‌روه‌ها گوتی: "ئەوەی زیاتر نیگەرانم دەکات، مووشەکە بالیستییەکانە".
گوتیشی: "ئێوە بینیتان چی ڕوویدا لێرە کاتێک تەنها 26 مووشەک لەناو ئیسرائیلدا کەوتە خوارەوە و چەند زیانی لێکەوتەوە. بیهێننە بەرچاوتان ئەگەر 26 مووشەک نەبووایە کە بەر ئیسرائیل کەوتبا، بەڵکو 260 مووشەک ببووایە؟ قەبارەی زیانەکە چەند دەبوو؟".
هەلی هەڵگیرسانی ڕووبەڕووبوونەوەیەکی نوێ لە نێوان ئێران و ئیسرائیلدا بەهێزتر دەبێت، لەگەڵ زۆربوونی ڕاپۆرتەکان کە ئامادەکارییەکانی هەردوو لا بۆ شەڕی داهاتوو ئاشکرا دەکەن؛ ڕاپۆرتێکی ڕۆژنامەی "وۆڵ ستریت جۆرناڵ" لە 11ـی تەمموزدا باسی لەوە کرد کە سەرۆک وەزیرانی ئیسرائیل، بنیامین نەتانیاهۆ، لە میانی کۆبوونەوەی مانگی ڕابردوویان لە کۆشکی سپی، سەرۆکی ئەمریکا دۆناڵد ترەمپی لە ئەگەری ئاراستەکردنی گورزی نوێ بۆ تاران ئاگادار کردووەتەوە.
بەپێی ڕاپۆرتەکە، ترەمپ بە سەرۆک وەزیرانی ئیسرائیلی گوتووە کە چارەسەرێکی دیپلۆماسی پێ باشترە، بەڵام ڤیتۆی لە دژی گورزێکی ئیسرائیلی بەکارنەهێناوە ئەگەر ئێران هەوڵی زیندووکردنەوەی بەرنامە ئەتۆمییەکەی بدات.
بەڵام ترەمپ دوای دوو ڕۆژ لە کۆبوونەوەی لەگەڵ نەتانیاهۆ، چووە پاڵ هەوڵەکانی دەستپێکردنەوەی شەڕ، کاتێک لەسەر ماڵپەڕی "تروس سۆشیاڵ مۆندەی" نووسی کە ویلایەتە یەکگرتووەکان "ئەگەر پێویست بکات، دووبارە دەیکاتەوە"، وەک ئاماژەیەک بە لێدانی بنکە ئەتۆمییەکانی ئێران.
وەڵام بدەوه