هیندستان وەڵامی ترەمپ دایەوە

هیندستان پلانەکانی بۆ کڕینی چەک و فڕۆکەی نوێی ئەمریکی هەڵپەسارد، هەنگاوەکەش رەنگدانەوەی بڕیارەکەی دۆناڵد ترامپ سەرۆکی ئەمریکایە بەرامبەر بەو باجانەی کە بەسەر هەناردەکردنی وڵاتەکەدا سەپاندوویەتی، بەمەش پەیوەندییە دووقۆڵییەکانیان بۆ نزمترین ئاست لە ماوەی دەیان ساڵدا دابەزیوە. ئاژانسی رۆیتەرز لە زاری بەرپرسانی هیندستانەوە رایگەیاندووە، راجنات سینگ وەزیری بەرگری هیندستان پلانی هەبووە لە چەند هەفتەی داهاتوودا گەشت بۆ واشنتۆن بکات بۆ راگەیاندنی رێککەوتنی نوێی چەک، بەڵام گەشتەکە هەڵوەشاوەتەوە. لە 6ی ئابدا ترامپ بەرێژەی 25٪ باجی لەسەر هاوردەکردنی هیندستان سەپاند ئەمەش وەک سزادانی نیودەلهی لەبەرامبەر کڕینی نەوتی روسیا، بەمەش باج لەسەر هەناردەکردن بۆ ئەمریکا گەیشتە 50%، ئەمەش یەکێکە لە بەرزترین رێژەکان کە بەسەر هەر هاوبەشێکی بازرگانی واشنتۆندا سەپێندراوە.