روانگەی عێراقی سەوز رایدەگەیەنێت، کۆتایی ئەم مانگە بەردانەوەی ئاو لە تورکیاوە بۆ عێراق رادەگیرێت، پێشبینی دەکات تورکیا ماوەی بەردانەوەی ئاو بۆ عێراق درێژ نەکاتەوە.
ئەمڕۆ شەممە، 9ی ئابی 2025، روانگەی عێراقی سەوز راپۆرتێکی بڵاوکردەوە و تێیدا هاتووە، تورکیا زۆر گرنگی بە پرسی ئاو دەدات، لەبەرامبەردا عێراق زۆر ئەو بابەتە پشتگوێ دەخات ئەگەرچی زۆرترین هۆشداری پێدراوە لەسەر کەمکردنەوەی بەفیڕۆدانی ئاو، چ بۆ بەکارهێنانی ناوخۆیی یان کشتوکاڵی.
ڕوانگەی عێراقی سەوز باسی لەوەش کرد، تاوەکوو ئێستا عێراق لە بەڕێوەبردنی ئاودا سەرکەوتوو نەبووە، و بەگوێرەی گوتەی عەون زیاب، وەزیری سەرچاوەکانی ئاو، ئاستی یەدەگی ئاو لە عێراق گەیشتووەتە نزمترین ئاس.
تورکیا لە سەرەتای مانگی تەموزەوە دەستیکردووە بە بەردانەوەی 420 مەتر سێجا/ چرکە ئاوی رووباری دیجلە و فورات، بریارە تا کۆتایی ئەم مانگە بەردەوام بێت، ئەمەش بۆ ئەوەی عێراق کەمێک لە قەیرانی ئاو رزگاری بێت.
قەیرانی وشکەساڵی و کەمئاوی بەرۆکی عێراقی گرتووە، ئەمەش بەهۆی کەمبارانی و گۆڕانی کەشوهەوا و دابەزینی ئاستی ئاوی رووباری دیجلە و فورات بووە.
وەڵام بدەوه