کاتی هێرشی سەر ئێران راگەیاندرا

  هاوکات لەگەڵ بەڕێوەچوونی گفتوگۆکانی دۆحە لە نێوان قەتەر و ئێران لەسەر بنەمای پەیامەکەی واشنتن بۆ وەستانی ئاڵۆزییەکان و دەستپێکردنەوەی دانوستانەکان، ڕاپۆرتەکان ئاماژە بۆ ئەگەری جووڵەیەکی سەربازیی نوێ دژی ئێران دەکەن.
 کەناڵی 12ی ئیسرائیلی لە ڕاپۆرتێکدا ئاماژەی بۆ نزیکبوونەوەی قۆناغێکی تری ئاڵۆزییەکان لەگەڵ ئێران کردووە.
 توێژەرێک لە پەیمانگەی توێژینەوەکانی ئاسایشی نەتەوەیی ئیسرائیل دەڵێت، ڕەنگە لە ماوەی چەند ڕۆژێک یان چەند هەفتەی داهاتوودا، سەرۆکی ئەمەریکا بگاتە ئەو ئەنجامەی چاوەڕوانکردنی وەڵامی تاران چیتر سوودی نییە.
 ئاماژەی بەوەیش کردووە، پێشبینی دەکرێت سەرۆکی ئەمەریکا هەوڵی ئەنجامدانی جووڵەیەکی سەربازی دژی ئێران بەر لە مانگی کانوونی دووەمی داهاتوو بدات، واتە وادەی دەستبەرکاربوونی ئەندامانی نوێی کۆنگرێس.
 بەپێی ڕاپۆرتەکە، بۆیە ڕەنگە لە قۆناغی داهاتوودا پەرەسەندنی سەربازی بەسەر حیساباتەکانی ئەمەریکادا زاڵ بێت و دۆخەکە ئاڕاستەیەکی تر وەربگرێت.