دوای ئەو گورزە گەورەی هەفتەی رابردوو ئیسرائیل لە حوسییەكانی یەمەنی وەشاند و سەرۆك وەزیران و 10 وەزیر و بەرپرسی باڵای حكوومەتەكەیانی لە سەنعا كوشت و ژمارەیەكیشی بریندار كردن، حوسییەكان بەڵێنی تۆڵەكردنەوەیان دا، راپۆرتەكان ئاماژە دەكەن كە دەیان درۆنی بۆمبڕێژكراویان بەرەو ئیسرائیل هاوێشتووە و ئەمشەو دەگەنە ئامانجەكانیان.
وەك رۆژنامەی "مەعاریف"ی ئیسرائیلی باسی كردووە، حوسییەكان دەیان درۆنیان بە ئاراستەی ئیسرائیل هاوێشتووە و ئێستە چاودێری دەكرێن و لە كاتی نزیكبوونەوەیان لە ئیسرائیل هەوڵی تەقاندنەوەیان دەدرێت، بڕیارە درۆنەكان لە دەوروبەری سەعات نۆی ئێوارە بە كاتی ئیسرائیل بگەنە خاكی ئەو وڵاتە.
ئەو هێرشە درۆنییەی حوسییەكان دوای چەند سەعاتێك دێت لە راگەیاندنی ئەنجامدانی هێرشێكی تر بۆ سەر كەشتییەكی نەوتهەڵگری ئیسرائیلی لە باكوری دەریای سوور بە مووشەكێكی بالیستی.
شایەنی باسە پێنجشەمی رابردوو ئیسرائیل هێرشێكی فرەوانی كردە سەر سەنعا و شوێنی كۆبوونەوەیەكی حكوومەتی حوسییەكانی كردە ئامانج و ئەحمەد غالب رەهوی سەرۆكی حكوومەت و 10 وەزیر و بەرپرسی باڵای حكوومەتەكەی كوشت، كە بریتی بوون لە وەزیرانی داد و مافی مرۆڤ و ئابووری و پیشەسازی و وەبەرهێنان و كشتوكاڵ و دەرەوە و كارەبا و وزە و ئاو و رۆشنبیری و گەشتوگوزار و كار و كاروباری كۆمەڵایەتی و راگەیاندن و وەرزش و لاوان و بەرپرسی نووسینگەی سەرۆك وەزیران و سكرتێری ئەنجوومەنی وەزیران.
وەڵام بدەوه