سەرۆککۆماری ئێران دەڵێت، خەڵکی ئەو وڵاتە لە شێوازی کارکردنی حکومەت رازی نین و ئەو ئامادە نییە بچێتە بەرەی بەرامبەر خەڵک
مەسعود پزیشکیان، سەرۆککۆماری ئێران ئێوارەی پێنجشەممە، 04-12-2025 لە کۆبوونەوە لەگەڵ چالاکڤانانی سیاسی و کۆمەڵایەتیی پارێزگای کۆهگیلویە و بویرئەحمەد لە شاری یاسوج باسی کێشە و گرفتەکانی ئەو وڵاتەی کرد و گوتی، "کێشەی سەرەکیی ئێستای ئێران ئەوەیە کە خەڵک لە شێوازی کارکردنی حکومەت و داودەزگا حکومی و ئیدارییەکان رازی نین" و یەکەم کاری بنەڕەتیی ئەوان دەبێ ئەوە بێت بە کۆمەڵێک چاکسازی، حکومەت بچووک و کارا بکەن.
سەرۆککۆماری ئێران دەڵێت، بۆ کاراکردن و بچووککردنەوەی حکومەت رێگری و کۆسپیان لە بەردەم دایە، بەڵام ئەو سوورە لەسەر کردنی ئەو کارە، چونکە پێیوایە بە قازانجی خەڵکە و دادپەروەری و رەزامەندی خەڵکی لێدەکەوێتەوە.
پزیشکیان هەروەها گوتی، "گۆڕانکاری و چاکسازیی بنەڕەتی بە ساڵێک و دوو ساڵ ناکرێت و رەنگە چەند دەیە درێژە بکێشێت، بەڵام دەبێ لە خاڵێکەوە دەست بە گۆڕانکاری بکرێت."
سەرۆککۆماری ئێران دەشڵێت، تاوەکو ئەو جێگەیەی بتوانێت هەوڵ بۆ دروستکردن و بووژاندنەوەی ئێران و باشکردنی دۆخی ژیانی خەڵکی ئەو وڵاتە دەدات، بەڵام کەسێک نییە کە بکەوێتە بەرەی بەرامبەر خەڵک.
پزیشکیان گوتی، ئەو بۆ ئەوە نەبووەتە سەرۆککۆماری ئێران تاوەکو ستەم لە خەڵک بکات و ئەگەر لە شوێنێک کارێکی هەڵەیان کرد، ئامادەن چاکی بکەنەوە و سوود لە سەرنجی شارەزایان و ئەزموونی نێودەوڵەتیش وەربگرن بۆ چارەسەرکردنی کێشەکانی ئێران.
وەڵام بدەوه