ڕۆژی دووشەممە، ٢٢ی کانوونی یەکەمی ٢٠٢٥، دۆخی ئەمنیی ئێران و ئاسمانی شارە گەورەکان بووە جێگەی مشتومڕێکی توند و زانیارییە دژبەیەکەکان هەموانیان تووشی سەرلێشێوان کردووە. لە کاتێکدا میدیا فەرمییەکان باس لە تاقیکردنەوەی موشەکی دەکەن، دەزگای ڕاگەیاندنی دەوڵەت هەموو شتێک ڕەت دەکاتەوە.
چی ڕوویدا؟ تەمومژ لە تاران و ئەسفەهان
سەرەتا میدیا فەرمییەکانی ئێران لە زاری شایەتحاڵەکانەوە بڵاویان کردەوە کە مانۆڕی مووشەکی لە چەند شارێکی جیاوازی وەک (تاران، ئەسفەهان و مەشهەد) ئەنجام دراوە. کەناڵە تەلەگرامییەکانی سەر بە دەستەی ڕادیۆ و تەلەفزیۆنی ئێران و ماڵپەڕی "نوور نیوز"ی نیمچەفەرمی، ڤیدیۆی هەڵدانی مووشەکیان بڵاو کردەوە کە ئاسمان دەبڕن، بەبێ ئەوەی شوێنەکەی دیاری بکەن.
ڕەتکردنەوەی فەرمی: "تەنها هڵێکی سپی بوو!"
دوای بڵاوبوونەوەی گرتە ڤیدیۆییەکان، دەستەی ڕادیۆ و تەلەفزیۆنی ئێران بە فەرمی هەواڵەکەی ڕەتکردەوە و ڕایگەیاند: "ئەو وێنانەی بڵاوکراونەتەوە پەیوەندییان بە تاقیکردنەوەی موشەکییەوە نییە." بە وتەی ئەو دەزگایە، ئەوەی لە ئاسماندا بینراوە تەنها "شوێنەوار و ڕێڕەوی سپیی فڕۆکە" بووە کە لە بەرزییەکی زۆرەوە تێپەڕیوە.
ئەم لێدوانە تەمومژاوییە لە کاتێکدایە، ئیسماعیل بەقائی، گوتەبێژی وەزارەتی دەرەوەی ئێران، هەر ئەمڕۆ جەختی کردەوە کە "بەرنامەی مووشەکیی ئێران بۆ بەرگرییە و بە هیچ جۆرێک جێگەی گفتوگۆ و سازش نییە."
ئیسرائیل و ئیدارەی ترەمپ؛ هۆشداری لە هێرشێکی چاوەڕوانکراو
لەسەر ئاستی نێودەوڵەتی، ئەم جووڵە گوماناوییانەی ئێران دەنگدانەوەی خێرای هەبوو. پێگەی "ئەکسیۆس" ئاشکرای کرد کە ئیسرائیل ئیدارەی دۆناڵد ترەمپ، سەرۆکی ئەمریکای ئاگادار کردووەتەوە کە ئەم مانۆڕە مووشەکییانە ڕەنگە "سەرەتایەک بن بۆ وەشاندنی گورزێکی سەربازیی ئێران بۆ سەر ئیسرائیل."
بەرپرسێکی ئیسرائیلی ڕایگەیاندووە: "ئێمە ئاماژەی ئەوەمان بینیوە کە ئێران سەرقاڵی دووبارە بنیاتنانەوەی توانایە مووشەکییەکانیەتی." هەروەها سەرچاوە هەواڵگرییەکان دەڵێن، هەرچەندە هێشتا ئێران نەگەیشتووەتەوە ئاستی پێش شەڕی ڕابردوو، بەڵام هەنگاوەکان خێران و ڕەنگە لە ساڵی داهاتوودا ئەم بابەتە ببێتە هەڕەشەیەکی زۆر جددی و بەپەلە.
وەڵام بدەوه