کەشناسێک هۆشداری دەدات

ف ئەمشەو سێشەممە 10/3/2026، ئاراس جەبار، شارەزای بواری کەشناسی بڵاوی کردەوە: "پێشتر باسمان لەوە کرد شەپۆلێکی بەهێزی بارانبارین لە ئاردایە لە 12ی مانگەوە تا 24ی مانگ، ئێستا لە نەخشەکاندا هەردوو رۆژانی 15 و 16ی مانگ بەناجێگیرترین ماوە دەردەخات کە لەو دوو رۆژەدا بارستە هەوایەکی زۆر شێدار ناوچەکانمان دەگرێتەوە، واتا لەماوەی ئەو دوو رۆژەدا پێویستە هەموو لایەک ئاگاداربن هەموو ئەگەرێک کراوەیە بۆ دروستبوونی هەورەبرووسکەی توند و لافاوی خێرا و مەترسیدار و دابارینی تەرزە بە قەبارەی گەورە لەگەڵ دروستبوونی گێژەڵوکەی گەورە Tornado لەو شوێنانەی ناوەندی دروستبوونی هەورە سوپەرسێلەکان دەبن، دابەزینی بای توند Downburst کە ئەویش مەترسیدارە هەرچەندە کورت خایان و کتوپر دروست دەبێت."
ئاماژەشی بەوە داوە: "پێشبینی هاتنی گەردەلوولێکی بەرفراوانی خۆڵبارینیش دەکرێت هەر لەگەڵ ئەو سیستەمەدا کە لە باکووری ئەفریقاوە دێت وەک ئەوەی ئێستا چاوەروان کراوە خۆڵبارینەکە زۆر چر دەبێت و پێشبینی دەکرێت سەرجەم ناوچەکانی عێراق و هەرێمی کوردستان بگرێتەوە، واتا لەگەڵ ئەو دۆخە ناجێگیر و باران و تەرزە و هەورەبرووسکەدا لە  15 و 16ی مانگ خۆڵبارانێکی چڕیشمان دەبێت کە وەک ئەوەی دەرکەوتووە لەماوەی چەند ساڵی ڕابردوودا چڕترین و فراوانترین شەپۆلی خۆڵبارین دەبێت بۆ سەر ناوچەکە."