بە پەیامێک ئێران ترەمپ شۆک کرد

​سەرکردە باڵاکانی کۆماری ئیسلامیی ئێران لە پەیامێکی هاوبەش و هاوکاتدا وەڵامی لێدوانەکانی دۆناڵد ترەمپ، سەرۆکی ئەمریکایان دایەوە و ڕایانگەیاند، کە لە ناوخۆی ئێراندا هیچ جیاوازییەک لە نێوان توندڕەو و میانڕەودا نییە.
​ئەمڕۆ پێنجشەممە، ٢٣ـی ٤ـی ٢٠٢٦، هەریەکە لە مەسعوود پزیشکیان (سەرۆک کۆمار)، محەمەد باقر قالیباف (سەرۆکی پەرلەمان) و غولام حوسێن موحسین ئیژەیی (سەرۆکی دەسەڵاتی دادوەری)، پەیامێکی هاوشێوەیان بڵاوکردەوە. 
لە پەیامەکەدا هاتووە: "لە ئێرانی ئێمەدا توندڕەو و میانڕەو بوونی نییە، هەموومان ئێرانی و شۆڕشگێڕین."
​ئەم کاردانەوەیە دوای ئەوە دێت کە دۆناڵد ترەمپ ڕایگەیاندبوو بەرپرسانی ئێران دابەشبوون بەسەر دوو بەرەی توندڕەو و میانڕەودا و "نازانین کێ بڕیارە بەدەستی یەکەمە". لە بەرامبەردا، سەرکردەکانی ئێران جەختیان کردەوە کە بە یەکگرتوویی گەل و دەوڵەت و بە "گوێڕایەڵی تەواو لە ڕێبەری مەزن"، هەر دەستدرێژکارێکی تاوانبار پەشیمان دەکەنەوە.
​لە کۆتایی پەیامە هاوبەشەکەدا هاتووە: "یەک خودا، یەک ڕێبەر، یەک نەتەوە، و یەک ڕێگە؛ ئەویش ڕێگەی سەرکەوتنی ئێرانی ئازیزتر لە گیان."