ناتانیاهۆ تووشی شێرپەنجە بووە

بنیامین نەتانیاهۆ، سەرۆک وەزیرانی ئیسرائیل ئاشکرایکرد، لە قۆناغەکانی سەرەتای تووشبوونی بە شێرپەنجەی پڕۆستات چارەسەری وەرگرتووە و لە ئێستادا دۆخی تەندروستیی زۆر باشە و بەتەواوی لە نەخۆشییەکە چاکبووەتەوە.
میدیاکانی ئیسرائیل بڵاویانکردەوە، نەتانیاهۆ لە ڕاپۆرتی ساڵانەی تەندروستیی خۆیدا ڕایگەیاندووە؛ لە کاتی پشکنینی ئاسایی و بەدواداچوون بۆ نەشتەرگەرییەکەی پێشووی کە بۆ گەورەبوونی پڕۆستات بۆی کرابوو، پزیشکەکان هەستیان بە گرێیەکی بچووکی شێرپەنجەیی کردووە کە لە قۆناغی زۆر سەرەتاییدا بووە و هیچ بڵاوبوونەوەیەکی بە جەستەیدا نەبووە. ئاماژەی بەوەشکردووە، دەستبەجێ بڕیاری وەرگرتنی چارەسەری داوە و دوای چەند دانیشتنێکی کورت، گرێ شێرپەنجەییەکە بەتەواوی لابراوە، بەبێ ئەوەی کار بکاتە سەر ڕاپەڕاندنی ئەرکەکانی ڕۆژانەی.
سەرۆک وەزیرانی ئیسرائیل هۆکاری شاردنەوەی نەخۆشییەکەی بۆ ماوەی دوو مانگ ڕوونکردووەتەوە و دەڵێت، بڵاوکردنەوەی ڕاپۆرتە تەندروستییەکەی دواخستووە بەهۆی بارودۆخی جەنگی دژ بە ئێران.