سوپای پاسداران پەیامی نوێی بە ئەمریکا دا

ئەمڕۆ سێشەممە، میدیاکانی ئێران پەیامێکی وتەبێژی سوپای پاسدارانیان بڵاوکردەوە، کە تێیدا جەخت لە گەشەسەندن و بەهێزبوونی تواناکانی وڵاتەکەی دەکاتەوە. سوپای پاسداران پێی وایە لە ئێستادا توانای شەڕکردنیان لە جاران بەهێزتر بووە و سەرجەم زیانەکانی پێشوویان چاک کردووەتەوە، بە جۆرێک هێزە چەکدارەکانیان لە دۆخێکی زۆر باشتردان بەراورد بە ڕابردوو. وتەبێژی سوپای پاسداران ڕایگەیاند: سەرەڕای ئەوەی ئەمریکا توانایەکی بەربڵاوی وشکانی، دەریایی و ئاسمانی بەکارهێنا، بەڵام نەیتوانی بۆ چەند خولەکێکیش کۆنتڕۆڵکردنی گەرووی هورمز لە دەستی ئێران وەربگرێت.لە بەشێکی دیکەی پەیامەکەدا هاتووە، لەم ماوەیەدا نەک هەر توانای سەربازیی ئێران لاواز نەبووە، بەڵکو لە چەندین بواردا بەهێزتر بووە، بەتایبەتی لە پێشخستنی توانای چەکە هێرشبەرەکان و سیستمی بەرگریی ئاسمانیدا هەنگاوی بەرچاویان ناوە.
سوپای پاسداران هۆشداری دەدات کە ئەگەر ڕووبەڕووبوونەوەی سەربازی ڕووبدات، ئەوا سرووشتی ئۆپەراسیۆنەکان، جوگرافیای شەڕەکە و تەنانەت جۆری ئەو چەکانەش کە بەکاردەهێنرێن جیاواز دەبن، بۆیە هێزەکانیان بەتەواوی ئامادەییان بۆ هەر سیناریۆیەک هەیە کە بێتە پێشەوە.