حوسییەکان هێرشی کرد

گرووپی ئه‌نساروڵای یه‌مه‌ن ناسراو به‌ "حووسییه‌كان" به‌رپرسیاریه‌تیی خۆیان له‌ هێرشكردنه‌ سه‌ر پاڵاوگه‌یه‌كی سه‌ر به‌ كۆمپانیای ئارامكۆی سعوودیه‌ له‌ شاری جازانی باشووری سعوودیه‌ ڕاگه‌یاند.
گوته‌بێژێك به‌ ناوی گرووپی حووسییه‌كان ئاشكرای كرد، كه‌ پاڵاوگه‌یه‌كی ئارامكۆ له‌ شاری جازان به‌ درۆن له‌لایه‌ن هێزه‌كانمانه‌وه‌ هێرشی كرایه‌ سه‌ر و به‌ وردی بۆردمان كراوه‌.
ئاماژه‌ی داوه‌، بۆردمانكردنی ئه‌و پاڵاوگه‌یه‌ی سعوودیه‌ له‌ وه‌ڵامی به‌زاندنی سنووری ئاسمانی یه‌مه‌ن بوو له‌لایه‌ن سعوودیه‌وه‌ له‌ پارێزگه‌كانی سه‌عده‌ و حه‌جه‌ی یه‌مه‌ن به‌ فڕۆكه‌ی بێ فڕۆكه‌وانه‌وه‌.
هاوكات وه‌زاره‌تی وزه‌ی سعوودیه‌ به‌یانی ئه‌مڕۆ یه‌كشه‌م ئاشكرای كرد، كه‌ دوای بۆردمانكردنی تیمه‌كانی ئاگركوژێنه‌وه‌ توانیویانه‌ ئاگری به‌رزبووه‌وه‌ له‌ پاڵاوگه‌یه‌كی كۆمپانیای ئارامكۆی سعوودی له‌ جازان دابمركێننه‌وه‌. دووپاتی له‌وه‌یش كردووه‌ته‌وه‌ كه‌ بۆردمانه‌كه‌ ته‌نیا زیانی مادی لێ كه‌وتووه‌ته‌وه‌ و هیچ زیانێكی گیانی نه‌بووه‌.