ئێران تەسلیم نابین

هاوكات لەگەڵ باڵادەستیی توندڕۆكان و زاڵبوونیان بەسەر بڕیاری شەڕ و ئاشتی لە تاران، هاوكات دەنگێك هەیە داوای رێككەوتن و ئاشتی دەكات، بەتایبەتی لە لایەن میانڕۆكانەوە، مەسعوود پزیشكیان سەرۆكی ئێران لە ستایشكردنی رێككەوتنی سەرەتایی حوزەیرانی رابردوو لەگەڵ ئەمەریكا بەردەوامە، هاوكات دووپاتی كردەوە كە دۆخی ئێران سەختە و هەموو هەوڵێك بۆ نەقڵێشانەوەی دۆخەكە دەدەن.
پزیشكیان لە وتارێكی تەلەڤزیۆنیدا گوتی، درك بەوە دەكەین كە كۆمەڵگەكەمان بە دەست چەندان سەختییەوە دەناڵێنێت، بۆیە هەموو هەوڵێك بۆ خۆپاراستن لە قڵێشانەوەی دۆخەكە دەدەین، ئێستە روبەڕووی شەڕێكی سەرانسەری لە بوارەكانی ئابووری و سەربازی و تەناهی بووینەتەوە و سەرۆكی ئەمەریكا بە ئاشكرا رای گەیاند كە توندترین سزا بەسەر ئێران دەسەپێنێت.
لەوكاتەی بڕیارە بۆ دەست پێكردنەوەی هەوڵەكانی ئاشتی و دانوستان، سبەی عاسم مونیر سوپاسالاری پاكستان سەردانی تاران بكات، پزیشكیان ستایشی یاداشتی لێكگەیشتتنی واژووكراوی لەگەڵ  ئەمەریكا كرد و رای گەیاند كە باشترین رێگەیە بۆ ئێران بۆ دەربازبوون لەو دۆخە چەقبەستووەی نەشەڕ و نەئاشتی ئێستە، كە هیچ بڕگەیەكی تیادا نییە باسی سازشكردنی ئێران بكات، بەڵام پابەندی رێنوێنییەكانی رابەری باڵا دەبین.