ئێران مەرجی کۆتایی راگەیاند

​محەممەد باقر قالیباف، سەرۆکی پەرلەمانی ئێران ڕایدەگەیەنێت، کردنەوەی گەرووی هورمز پەیوەستە بە جێبەجێکردنی بەڵێنەکانی ئەمریکاوە، و جەختیش دەکاتەوە کە مەرجی سەرەکییان کۆتاییهێنانە بە جەنگ دژی ئێران و هاوپەیمانەکانی.
​ئەمڕۆ چوارشەممە، 2ـی 9ـی 2026، محەممەد باقر قالیباف، سەرۆکی پەرلەمانی ئێران لە پەیامێکدا کە تێیدا مەرجەکانی تارانی بۆ ئاساییکردنەوەی دۆخی گەرووی هورمز ئاشکرا کردووە. ڕایگەیاند، مەرجی ئێران بۆ کردنەوەی گەرووی هورمز؛ دەبێت ئەمریکا کۆتایی بە جەنگ بهێنێت. 
قالیباف جەختی لەوە کردەوە کە دەبێت ئەمریکییەکان پابەندی تەواوی بەڵێنەکانیان بن بۆ ئەوەی ئێرانیش هەنگاو بۆ کردنەوەی گەرووی هورمز بنێت.
​سەبارەت بە وردەکارییەکانی ڕێککەوتن و دانوستانەکان، سەرۆکی پەرلەمانی ئێران ڕوونی کردەوە: "ئێمە لە میانی ماددەی یەکەمی لێکتێگەیشتنەکەدا، بە توندی جەختمان لە کۆتاییهێنان بە جەنگەکەیان دژی ئێران و هاوپەیمانەکانمان لە بەرەی موقاوەمە کردووەتەوە."
​ناوبراو ئاشکراشی کرد کە لایەنی بەرامبەر (ئەمریکا) لە سەرەتادا لە دەقە پێشنیازکراوە ١٥ ماددەییەکەیدا، داوای ڕاگرتنی تەواوەتیی سەرجەم چالاکییە مووشەکی و ئەتۆمییەکان، و هەروەها کار و چالاکییەکانی بەرەی موقاوەمەی کردبوو.