زانیاری سەرەکی
سوپای ئەمریکا دو پاتری موشەکی جۆری "پاتریۆت"ی لە هەریەکە لە وڵاتانی سعودیە و قەتەر جێگیرکردوە، ئەوەش بە مەبەستی پاراستنی دامەزراوە وزەییەکان لەو وڵاتانە لە ئەگەری دەستپێکردنەوەی هێرشە سەربازییەکان بۆ سەر ئێران.
وردودرشتی هەواڵ
ماڵپەڕی ئەکسیۆس لە زاری دو بەرپرسی ئەمریکی و سەرچاوەیەکی ناوچەییەوە بڵاویکردەوە کە جێگیرکردنی ئەو پاترییانە بۆ پاراستنی ژێرخانی وزە ئەنجامدراوە.
لە مانگی ڕابردودا پاترییەکیان ڕەوانەی سعودیە کراوە بۆ پاراستنی کێڵگەیەکی سەرەکیی نەوت، پاترییەکی تریش لە قەتەر بۆ بەرگریکردن لە دامەزراوەیەکی گازی سروشتی جێگیرکراوە.
ئامانجی سەرەکی لەم هەنگاوە دڵنیادانە بە هەردو وڵات کە واشنتن ژێرخانی گرنگی وزەیان دەپارێزێت پێش ئەوەی دۆناڵد ترەمپ سەرۆکی ئەمریکا هێرشە جەنگییە گەورەکان دژی ئێران دەستپێبکاتەوە.
ترەمپ ڕۆژی پێنجشەممە ڕایگەیاند کە بیر لە نوێکردنەوەی هەڵمەتێکی بۆردومانکردن دەکاتەوە لە هەفتەکانی داهاتودا و جەختیکردەوە: "ئێستا دەبێت بڕیارێک بدەم: یان ئێران ڕێککەوتنەکە واژۆ دەکات، یان ئیتر بونی نابێت".
زانیاری پەیوەندیدار
سەرکردەکانی سعودیە و قەتەر لە سەرەتای مانگی ئابدا داوایان لە ترەمپ کردوە هێرشی گەورە دەستپێنەکات بۆ سەر دامەزراوە وزەییەکانی ئێران، بەهۆی ترس لە تۆڵەسەندنەوە لە دامەزراوە نەوتی و گازییەکانی خۆیان.
واشنتن بۆ هێرشە گەورە نوێیەکان پێویستی بە ڕەزامەندیی سعودیە هەیە بۆ بەکارهێنانی ئاسمانی وڵاتەکە، بەڵام ڕیاز بەبێ دڵنیاییدان لە پاراستنی دامەزراوە نەوتییەکانی بە ئەگەری زۆرەوە ڕازی نابێت.
بەگوێرەی بەرپرسێکی ئەمریکی، فڕۆکەهەڵگری "یو ئێس ئێس تێدۆر ڕۆزڤێڵت" و گروپی هێرشبەرەکەی لە ڕۆژی یەکشەممەدا سان دیێگۆیان بەجێهێشتوە و چاوەڕوان دەکرێت لە ناوەڕاستی تشرینی دوەمدا بگەنە ناوچەکە.
#kurdistanpress
وەڵام بدەوه