ئێران نەیارەکانی شۆک دەکات

مووشەك و درۆنەكانی ئێران ئامرازێكی بەهێزی ئێران بوون لە دوو گەڕی شەڕ لەگەڵ ئیسرائیل و ئەمەریكا، هاوكات بڕگەیەكی سەرەكیی ناكۆكییەكانی دانوستانە لەگەڵ ئەمەریكا، لە پاڵ بەرنامەی ناوەكی و میلیشیاكانەوە، بەپێی راپۆرتێك و لە دوای ئەو هەموو شەڕی چەند مانگی رابردوو، تارانی جبەخانەی مووشەك و درۆنەكان بنیات ناوەتەوە.
ئاژانسی "بلومبێرگ"، ئاماژی كرد كە لەوكاتەی دانوستانەكانی نێوان ئێران و ئەمەركیا تووشی بەربەست بووەتەوە، ئەو لە ژمارەیەك بەرپرسی ئاگەداری رۆژاوایی گواستەوە، تا ئێستە تاران توانای بەرهەمهێنانی چەكی نوێ و بنیاتنانەوەی جبەخانەكانی ماوە، دووپاتی دەكەنەوە كە ئێران ئەمبارێكی گەورەی مووشەكی بالیستی و چەكی دژەكەشتی هەیە و توانای بەرهەمهێنانی زیاتریشی لە ماوەیەكی كورت هەیە.
جیا لەوە رووسیا مووشەك بە ئێران دەدات، ئەوە لەو كاتەی دۆناڵد ترەمپی سەرۆكی ئەمەریكا چەند جارێك رای گەیاند كە توانای سەربازی و پیشەسازی سەربازیی ئێرانیان لەناو بردووە، راپۆرتەكە ئاماژە دەكات كە هێرشەكانی چەند مانگی رابردووی ئەمەریكا و ئیسرائیل زیانی گەورەیان بە توانای بەرهەمهێنانی مووشەكی ئێران گەیاندووە، ئەگەرچی قەبارەی ئەمباری مووشەكی ئێران و توانای قەرەبووكردنەوەی زیانەكانی تا ئێستە نادیارە.
بەپێی راپۆرتەكە بەردەوامبوونی ئێران لە بەرهەمهێنانی مووشەك و چەكی دژەكەشتییەكان، بواری زیاتری بۆ بەرگریكردن و خۆراگری پێ دەبەخشێت، ئەگەر واشنتن دەست بە هێرشەكانی بكاتەوە.