لەوەتەی کورد هەیە پەرتەوازەیی دەردێکی کوشندەو فاکتەرێکی بەرچاوی پاشەکشەو بەرەو پێشەوەنەچوونی دۆزی رەواکەی بووە.
یەکبوون و گرتنەبەری تاکە ئاراستەی سیاسی بۆ گەلێکی بەشمەینەتی کورد بەهۆی بەکرێگیراوی لە نێوریزەکانیەوە، هەمیشە لە قۆناغی خواست و ئومێدو ئارەزوورکاندا ماوەتەوەو لە چوارچێوەیەکی تەسکدا قەتیس بووە.
کورد بەهۆی ئەو دابەشکاریە بێویژدانیەی لەلایەن زلهێزەکان بە گشتی و قەوارەی زولم و ستەمکاری وڵاتە ئیقلیمیەکانەوە بەسەریداهاتووە، ئێستاشی لەگەڵدا بێ نەیتوانیوە ریزە نەتەوەییەکانی یەکبخات و بیخاتە خزمەت پرسێکی گەورەی نیشتیمانی و نووسینەوەی چارەنووس و هەنگاونان بەرەو سەربەستی و ئازادیەوە.
دەبووایە کورد بەهۆی ئەو زوڵم و ستەمکاریە مێژووییەی لێی کراوە، لەهەموو ئەو نەتەوانەی رۆژهەڵاتی ناوین زیاتر بە تەنگ یەکریزیەوە بووایە و کاری جدی بۆ بکردایە.
گەلی کورد لە رۆژهەڵاتی ناوەڕاست زیاتر لەهەر نەتەوەیەکی ستەملێکراو پێویستی بە یەکڕیزی بووە بۆ گەیشتن بە ئامانجەکانیەوە. لێ لەسەر ئەرزی واقع هەمیشە کۆمەڵێک کەسایەتی و ئاڕاستەی سیاسی هەبوونە درزیان خستۆتە نێو ڕیزەکانی کورد و لە خرابترین حاڵەتیشدا سەنگەریان لە زۆرینەی لایەنەکانی ناو بزووتنەوەی رزگاریخوازی کوردەوە گرتووە و بە چەک رووبەروویان بوونەتەوە.
وەڵام بدەوه