دووبەرەکی و پەرتەوازەیی ڕیزەکانی کورد بە پێی حیکایەت و گێڕانەوەکانی مێژوو، گەورەترین ئاستەنگی بەردەم کوردو دۆزە ڕەواکەی بووە بۆ گەیشتن بە ئامانج و بەرکەماڵ بوونی هیواو ئاواتە نیشتیمانی و نەتەوەییەکانیەوە.
مێژوو بە درێژایی پانتای نووسراوی خۆی و حیکایەت و داستانە تۆمارکراوو تۆمارنەکراوەکانیەوە، بە دڵنیاییەوە شاهیدی قوربانیدانی رۆڵە بە ئەمەکەکانی کورد بووە لە پێناو گەیاندنی کەشتی خەبات و تێکۆشان بە لەنگەری ئاسوودەیی و سەربەخۆیی و ئازادیەوە.
گەورەترین ئافەت و ڤایرۆسی بەردەم بەرکەماڵ بوونی خواست و ئاواتە نەتەوەیی و نیشتیمانیەکانی کورد لە هەر چوار پارچەی کوردستانی لەتکراوو لکێندراو بە دەوڵەتە ناسیۆنالیستیە دەمارگیرەکانی تورک و عەرەب و فارس، پەرتەوازەیی و یەکتر نەخوێندنەوەو هەل نەکردنی خودی کورد بووە لە گەڵ یەکترو لە ناوە خۆیدا.
رووداوەکانی ناو هەناوی دیرۆکی کوردان سەلماندوویەتی هەر کاتێ کورد لە ناوە خۆیدا یەکرەنگ و یەکدەنگ بەرەو ئارمانجە نەتەوەیی و نیشتیمانیەکانیەوە هەنگاوی ناوە، کوردو دۆزە رەواکەی چەندین قۆناغ بەرە پێشەوە رۆیشتوون و لە ئامانجە دوورو نزیکەکانیان نزیکتر بوونەتەوە.
هەرکاتێکیش ئەم یەکریزە بە هۆکارە دیارو نادیارە شاراوەکانەوە کێشەی تێکەوتووە، سەرلەبەری پرۆسەی خەباتی سیاسی و تێکۆشان لە پاشەکشێ دابووەو چەندین پێنگاڤ بۆ دواوە گەڕاوەتەوە.
وەڵام بدەوه