هەستیاریی قۆناغی ئێستا لێمان دەخوازێ یەکگرتوو بین
گرژی و ئاڵۆزیەکانی شانۆی سیاسەت لە ئاستی جیهان بە گشتی و رۆژهەڵاتی ناوین بە تایبەتی، وامان لێدەکات بە ئەسپایی و حیساباتی وردەوە بەرەو ئاییندە هەنگاو بنێین و دەست بە دەسکەوتەکانەوە بگرین و رێ لەهەر پرۆژەو نیەتێکی خراپی جیاکردنەوەی زۆن و شارو ناوچەو کەرت کردنی هەرێمەوە بگرین.
ئامادەیی هۆکارەکانی هەڵکشان و داکشانی دۆخی سیاسی لە رۆژهەڵاتی ناوین، لە گشت حزب و لایەنە سیاسیە کوردستانیەکان دەخوازێ مانا بۆ سیاسەت و کاری پێکەوەییەوە بگێڕنەوەو رێ لە بارگرژیەکانەوە بگرن.
مێژووی کورد مێژووی پەرتەوازەیی و دووبەرەکی و لێکترازانی ناو ماڵەکەیەتی. ئەم لێکترازان و پەرتەوازەییە وەک ئافات و ڤایرۆسێکی کوشندە لە دێر زەمانەوە چۆتە ناو جەستەی کورد خۆی وەک نەتەوە.
نائامادەیی یەکبوون بە مانا سیاسی و نەتەوەییەکەی ساڵەهایە لەلایەن نەیارانی نەتەوەی کورد وەک ئامرازێک بۆ زیاتر رۆچۆنی کورد لە ناو زەڵکاوی دووبەرەکی و پەرتەوازەیی بەکار هێنراوەو وەبەرهێنانی تێدا کراوە.
گەر کورد بۆ تەنیا جارێکیش وەک گەلێکی یەکپارچە و یەکرەنگ و یەکدەست لە عێراق دەربکەوێ و رێگە بە پەرتەوازەییەوە نەدات و فوو نەکاتە ناکۆکیە ناوەکیەکانەوە و جیاوازیەکانی بخاتە لاوە، بێگومان بە هێزترەوە دەردەکەوێ. ئەمەش وادەکات زووتر بە ئامانجەکانی بگات و پێگەیەکی بەهێزتر لە گۆڕەپانی سیاسی عێراق و تەنانەت هاوکێشە سیاسیەکانی رۆژهەڵاتی ناوەڕاستیشدا لە ئاییندەی جیوسیاسی ئەم ناوچەیە بۆ خۆی مسۆگەر بکات.
وەڵام بدەوه