رێکخستنەوەی بازاڕ هەنگاوێک بەرەوسەقامگیری نرخی شتومەک
یەکێک لە ئەرکە سەرەکیەکانی حکومەت چاودێری کردنی بازاڕو نرخی شتومەک و پێداویستیەکانی رۆژانەی هاوڵاتیانە.
لە دۆخی قەیراناوی و تەنگژەی ئابوریدا، بۆ رێگەگرتن لە هەڵاوسان و بەرزبوونەوەی لەرادەبەدەری نرخی شتومەک، ئەرکی حکومەتە لە رێگەی دەرکردنی رێنمایی و دامودەزگا لۆکاڵیەکانیەوە چاودێری چڕی بازاڕ بکات.
چاودێری کردنی بازاڕ گەرەکە بە ئاراستەی رێگەگرتن بێ لە بەرزونزمی نرخی کەلوپەل و پێداویستیەسەرەکیەکانی رۆژانەی هاوڵاتیان.
بەمجۆرە حکومەت رێگەلەوەدەگرێ هەندێ بازرگانی چاوچنۆک و هەلپەرەست لە رێگەی گڵدانەوەو شاردنەوەی کەلوپەل و پێداویستیە سەرەکیەکانەوە،یاری بە نرخەکان بکەن و نرخ و جۆرو جۆرێتی کاڵاکان بخەنە ژێر رکێف و کۆنترۆڵی خۆیانەوە و یاری بە ژیانی خەڵکەوە بکەن.
لەکاتی سەرهەڵدانی هەر جۆرە قەیرانێک و تەنگژەیەکی ئابوری و نشوستی داراییەوە، ئەگەر حکومەت دەستوبرد لە چاودێری بازاڕ و بەدواداچوون بۆ دەرەنجامی هەنگاوەکانیەوە نەکات، هەمیشە کۆمەڵە کەسانێکی چاوچنۆک و تێرنەخۆرو هەلپەرەست، هەوڵی شاردنەوەو دواتر خستنەبازاڕی کاڵاکان دەدەن و لە بەرزکردنەوەی نرخەکان و بێویژدانی سڵ لە هیچ بەدکرداریەک ناکەنەوە.
بە چاودێری کردنی بازاڕ حکومەت ئەم ئامانجانە دەپێکێ:
⁃ بەئەرک و بەرپرسیارەتی خۆی هەڵئەستێ
⁃ نرخەکان بە نزمی ئەهيڵێتەوە
⁃ پشتگیری چینی کەم دەرامەت دەکا
⁃ رێگە لە قورغکاری و گەندەڵی دەگرێ
⁃ سەرپێچیکاران و ئەوانەی پێشێلی یاساورێنماییەکان دەکەن رووبەرووی یاسا و لێ پێچینەوەو بەرپرسیارەتی دەکات.
⁃ رێگە لە بێسەرووبەری و بەرەڵایی بازاڕ دەگرێ.
وەڵام بدەوه