کورد لەوەتەی مێژووی بۆ نووسراوەتەوە جۆرێک لە هەستیار بوونی پێوەدیاربووە بەرامبەر بە پرسی یەکریزیەوە.
لەوەتەی کورد هەیە پەرتەوازەیی دەردێکی کوشندەو فاکتەرێکی بەرچاوی پاشەکشەو بەرەو پێشەوەنەچوونی دۆزی رەواکەی بووە.
یەکبوون و گرتنەبەری تاکە ئاراستەی سیاسی بۆ گەلێکی بەشمەینەتی کورد بەهۆی بەکرێگیراوی لە نێوریزەکانیەوە، هەمیشە لە قۆناغی خواست و ئومێدو ئارەزوورکاندا ماوەتەوەو لە چوارچێوەیەکی تەسکدا قەتیس ماوەتەوە.
کورد بەهۆی ئەو دابەشکاریە بێویژدانیەی لەلایەن زلهێزەکان بە گشتی و قەوارەی زولم و ستەمکاری وڵاتە ئیقلیمیەکانەوە بەسەریداهاتووە، ئێستاشی لەگەڵدا بێ نەیتوانیوە ریزە نەتەوەییەکانی یەکبخات و بیخاتە خزمەت پرسێکی گەورەی نیشتیمانی و نووسینەوەی چارەنووس و هەنگاونان بەرەو سەربەستی و ئازادیەوە.
دەبووایە کورد بەهۆی ئەو زوڵم و ستەمکاریە مێژووییەی لێی کراوە، لەهەموو ئەو نەتەوانەی رۆژهەڵاتی ناوین زیاتر بە تەنگ یەکریزیەوە بووایە و کاری جدی بۆ بکردایە.
لێ مخابن ئەزمون پێمان دەڵێ و مێژووش بۆمانی سەلماندووە، بەهۆی ئامادەیی کۆمەڵە خۆفرۆش و بەرژەوەندپەرەست و بەکرێگیراوو ئەڵقەلە گوێی نێو ریزەکانی کورد خۆیەوە، گەلی کورد، سەرباری هەموو تراژێدی و کۆسپ و تەگەرەکانەوە بەردەوامە لەسەر دانی باجێکی قورس لە پێناو ئازادی و دەستەبەرکردنی مافە نەتەوەیی و یاسایی و ئاساییەکانیەوە.
وەڵام بدەوه