زۆری و بۆری رێکخراوەکانی کۆمەڵگە
یەکێک لە تایبەتمەندیە زاتیەکانی کۆمەڵگە مەدەنیەکان بوونی ژمارەیەکی زۆرە لە کۆمەڵەو دەستەو سەندیکا پیشەیی و مەدەنیەکان لە پانتای کاری کۆمەڵایەتی و پیشەیی و ئابوری و سیاسیدا.
ئەرکی ئەم کۆمەڵەو رێکخراوانە نوێنەرایەتی کردن و بەدەنگەوە هاتنی خواست و داواکاریەکانی هاوڵاتیان بە گشتی و چینو توێژە دیاریکراوەکانە لە بوارێکی دیاری کراوی پەیوەست بە کاری ئەم رێکخراوانەوە.
زیاد لەمەش رێکخستن و ئاڕاستەکردنی ئەرکو بەرپرسیارەتیەکان و رێ گرتن لە ئاڵۆزی و فەوزا لە کاتی داواکاری و نارەزایەتیەکان، ئەرکێکی لە پێشینەی ئەم رێکخراوانەیە.
پەیوەست بە هەرێمی کوردستانەوە، بوونی ژمارەیەکی زۆر لە رێکخراوەکانی کۆمەڵگەی مەدەنی، دۆخێکی ئاڵۆزی زۆری و بۆری هێناوەتە کایەوە.
بەشێک لە رێکخراوەکانی کۆمەڵگەی مەدەنی لە هەرێمی کوردستان تەنیا ناوێکن و دێیەکی وێران.
بەشێک لەمانە نەک هەر توانای رێکخستن و نوێنەرایەتی کردنی کۆمەڵگەو تاکەکانیان نیە، بەڵکو بوونەتە بارگرانی و تەنیا بە ئاراستەی دابین کردن و دەست خستنی بەشە بودجەو کۆمەڵێک پۆست و ئیمتیازاتەوە لێرەولەوێ چالاکی دەنوێنن.
هەژمونی ئەم زۆری و بۆریە بۆ جڤاکێکی وەک کوردستان، نەک پێویست نیە بەڵکو ئەوەی هەشە پێویستی بە رێکخستن و دوبارە هەڵسەنگاندن و چاوپێداخشاندنەوە هەیە، بە جۆرێک ئەرکوبەرپرسیارەتیەکان دیاری بکرێن و ئاڕاستەی کار کردن و ئامانج لە دامەزراندنیان بزانرێت.
وەڵام بدەوه