مژدەی پێدانی 12 مووچە بەسەریەکەوە گەیشت

هەوڵەکان بۆ چارەسەری کێشەی مووچەی خانەنشینانی هەرێم چڕ دەکرێنەوە؛ خانەنشینان پاداشتی ١٢ مووچە بە یەکجار وەردەگرن
لە مژدەیەکدا بۆ خانەنشینانی هەرێمی کوردستان، بڕیارە پاداشتی کۆتایی خزمەت کە پێکهاتووە لە ١٢ مووچە، بە یەکجار بەسەر خانەنشیناندا دابەش بکرێت. ئەم بڕیارە بەتایبەتی ئەو کەسانە دەگرێتەوە کە لە دوای ساڵی ٢٠٢١ـەوە خانەنشین بوون.
لەپێناو چارەسەرکردنی بنەڕەتیی کێشەی مووچەی خانەنشینانی هەرێمی کوردستان و خێراکردنی پرۆسەی خەرجکردنیان، لیژنەی دارایی لە پەرلەمانی عێراق هەردوو وەزیری دارایی عێراق و هەرێمی کوردستان، هەروەها سەرۆکی دەستەی خانەنشینی عێراقیش بانگهێشت دەکات.
لە لێدوانێکدا سەبارەت بە هۆکاری دواکەوتنی مووچەی خانەنشینان، د. جەمال کۆچەر، ئەندامی پەرلەمانی عێراق ڕایگەیاند کە هۆکارەکە پەیوەندی بە بەغداوە نییە، بەڵکو دەگەڕێتەوە بۆ سستی و دواکەوتنی تەواوکردنی مامەڵەی خانەنشینان لەلایەن دامودەزگاکانی هەرێمی کوردستانەوە. ناوبراو جەختی لەوە کردەوە کە هەر مامەڵەیەک لە هەرێمەوە بە تەواوکراوی بگاتە بەغدا، دەستبەجێ کاری لەسەر دەکرێت و مووچەکەی بۆ خەرج دەکرێت.
بۆ کۆتاییهێنان بەم گرفتە، بڕیارە لە ئایندەیەکی نزیکدا کۆبوونەوەیەکی تایبەت لە نێوان وەزیرانی دارایی عێراق و هەرێم، لەگەڵ سەرۆکی دەستەی خانەنشینی هەردوولا بەڕێوەبچێت، تاوەکو چارەسەرێکی بنەڕەتی بۆ میکانیزمی خەرجکردنی مووچەی خانەنشینانی هەرێمی کوردستان دابنرێت.