لە بارەی مووچە عێراق دڵنیایی دەدات

پارێزگاری بانکی ناوەندیی عێراق جەخت لەسەر ئەوە دەکاتەوە، هیچ کێشەیەکی دارایی نییە کە هەڕەشە لە مووچەی فەرمانبەران بکات.
 
 دەنگۆی نەبوونی نەختینە لە عێراق زۆرە و بەشێک لە مووچەخۆرانی عێراق لە دوا ڕۆژەکانی ساڵی 2024 مووچەکانیان درەنگ وەرگرت و ئەمەش ناڕەزایەتیی زۆری لێکەوتەوە، تەنانەت ئەو کات وەزارەتی دارایی عێراق ئەو دەنگۆیانەی ڕەتکردنەوە کە باس لە دابەشنەکردنی مووچە بەهۆی نەبوونی پارەی نەختینەوە دەکەن.
 
عەلی عەللاق، پارێزگاری بانکی ناوەندیی عێراق ڕایگەیاند:
 
هیچ کێشەیەکی دارایی نییە کە هەڕەشە لە مووچەی فەرمانبەران بکات و ئێمە توانا و سەرچاوەی زۆرمان هەیە.
 
یەدەگی بانکی ناوەندی زۆرە و توانای دابینکردنی خواست لەسەر دۆلار هەیە. هاوکات بانکی فیدراڵی ستایشی ڕێکارەکانی عێراقی سەبارەت بە حەواڵەی دەرەکی کردووە.
 
حەواڵەی هاتوو پەیوەستە بە بڕیاری سنووردارکردنی مامەڵەکردن بە دینار، هاوکات ڕێگەمان بە بانکەکان دا دۆلار هاوردە بکەن و توانیمان کارەکانی قاچاخچێتی سنووردار بکەین.
 
میکانیزمی پێدانی دۆلار بە گەشتیاران بەردەوامە و دەگاتە دەستی سوودمەندبووان، ڕێگەشمان بە بانکەکان دا تاوەکو دۆلار هاوردە بکەن و توانیمان قاچاخچێتی دۆلار سنووردار بکەین.