عێراق گەورەترین زەنگی مەترسیی لێدا

بەهۆی كەمی باران بارین لە وەرزی داراینی ئەمساڵ و بەرنەدانەوەی ئاو لەلایەن وڵاتانی دراوسێوە، ناوچەكانی عێراق بەتایبەت ناوچەكانی ناوەڕاست و باشوور ڕووبەڕووی کەمئاوی بۆتەوە، کە لە ماوەی 80 ساڵی ڕابردوودا هاوشێوەی نەبووە.
خالید شەممال، وتەبێژی وەزارەتی سەرچاوە ئاوییەکانی عیراق لە پەراوێزی کۆنگرەی پێنجەمی ئاو لە بەغدا ڕایگەیاندووە، بەراورد بە ساڵی ڕابردوو، ئەمساڵ ڕێژەی ئاوی کۆکراوەمان کەمترە، بۆیە ناچار بووین ڕووبەری چێندراوی کشتوکاڵی هاوینە کەمبکەینەوە.
ڕاشیگەیاند، عێراق تەنها لە 40%ی پشكی خۆی لە ئاو بۆ بەردەدرێتەوە، بۆیە زۆر بەڕوونی کەمبوونەوەی ئاو لە ڕووبارەکانی دیجلە و فوڕات بەدی دەکەین.
ئاماژەی بەوەشكرد، لە ماوەی 80 ساڵی ڕابردوودا، کەمبوونەوەی ئاومان بەو جۆرە نەبووە، ئەمەش بۆ کەمی باران لە ئەمساڵدا دەگەڕێتەوە لەگەڵ ئەوەشدا ئاوێکی کەممان بەهۆی توانەوەی بەفرەوە دەستکەوتووە.
وتەبێژی وەزارتەكە دەڵێت: لەسەرەتای هاویندا پێویست بوو بڕی ئاوی کۆکراوە زیاتر لە 18 ملیار مەتر چوارگۆشە بوایە، بەڵام ئێستا نزیکەی 10 ملیار مەتر چوارگۆشە ئاوی کۆکراوەمان هەیە.
ئاشكراشی كرد، پلانی فراوانکردنی زەوی چێنراو بە کشتوکاڵی هاوینەمان ڕاگرتووە، تەنها دەمانەوێت ڕووبەری سەوزایی و بەرهەمەکان بپارێزین، کە ڕووبەڕەکەی دەگاتە یەک ملیۆن و نیو دۆنم.