کاروانێکی تری هێزەکانی ئەمریکا کشانەوە

ئێوارەی دوێنێ كاروانێكی تری هێزەكانی ئەمەریكا لە عێراق، بەرەو بنكەی شەدادیی باشووری شاری حەسەكەی سووریا كشانەوە. ئەوەیش لە ماوەی 24 سەعاتدا كشانەوەی دووەمین كاروانی ئەو هێزەیە كە لە عێراقدان.

بەپێی گوتەی پەیامنێری پێگەی "شەفەق نیوز"، ئێوارەی دوێنی چوارشەم هێزێكی زۆری ئەمەریكی كە لە ژمارەیەك تانك و زرێپۆش و سەرباز پێكهاتوون، پێشتر لە بنكەی عەین ئەسەد لە پارێزگای ئەنبار بوون، بەرەو بنكەی شەدادیی باشووری شاری حەسەكە كشانەوە و لەوێ جێگیر بوون. ئەویش بەپێی بڕیاری پنتاگۆن كە بڕیاری داوە تا كۆتایی ئەمساڵ هێزەكانی لە عێراق بكشێنێتەوە.

ئاماژە دراوە كە كاروانە سەربازییەكە پێكهاتووە لە 80 باربەر كە كەلوپەلی لۆجیستی، هەروەها تانك و زرێپۆش و ئۆتۆمبێلی سەربازی و ژمارەیەك سەرباز كە تا ئێستە ژمارەیان بە دروستی ئاشكرا نەكراوە.

دووپات كراوەتەوە كە لە ماوەی 24 سەعاتدا، ئەمە دووەمین كاروانی سەربازیی ئەمەریكایە كە لە عێراقەوە بەرەو سووریا كشاوەتەوە.

هەمان سەرچاوە ئاماژەی بەوە دا كە سێشەمیش كاروانێكی سەربازیی هاوشێوەی ئەمەریكا، لە عێراقەوە گەیشتووەتە خاكی سووریا، ئەو كاروانەیش لە 50 باربەر و تانك و زرێپۆش پێكهاتووە و گەیشتوونەتە بنكەكانی خراب جیر و قرسك لە دەورەبەری شاری حەسەكە.

بڕیاری كشانەوەی هێزەكانی ئەمەریكا لە عێراق، تای ترسی لەلای عێراقییەكان بەتایبەتی حكوومەت و هێزەكانی دروست كردووە، لە ئێستەوە لێدوانی هەمەجۆر لەوبارەیەوە دەدرێ و هەندێك سەرچاوەیش پێشبینی شەڕێكی ناوخۆیی لە عێراقدا دەكەن، بەتایبەتی بەهۆی هێزەكانی حەشدی شەعبی كە زۆریان پابەندی فەرمانەكانی حكوومەت نابن و لەوەیش زیاتر سەربە ئێران و رێنوێنییەكان لەوێوە وەردەگرن، بۆیە كشانەوەی هێزەكانی ئەمەریكا وەك پێشبینی دەكرێ، هێزە توندڕۆ و تیرۆریستییەكان بە دەرفەتی وەربگرن و چالاكییەكانیان زیاتر بكەن